ՄԻԵԴ-ը Անդրիաս Ղուկասյանի բողոքը կքննի առաջնահերթության կարգով
Վճռաբեկ դատարանն այսօր մերժել է Վերաքննիչ դատարանի կողմից Անդրիաս Ղուկասյանի կալանքի կիրառման և գրավի միջնորդության վերաբերյալ մերժման բողոքը: «Հուսով էինք, որ նորմալ որոշում կկայացնեին: Արեցին, այն, ինչ արեցին: Պետք է սխալը շտկեին եւ ասեին, որ ուրիշ պատճառաբանությամբ են կալանքի տակ թողնում»,- «Ա1+»-ին ասաց նրա պաշտպան Կարեն Մեժլումյանը: Սարի թաղի դեպքերից հետո դատարանը Անդրիաս Ղուկասյանի նկատմամբ կալանավորման որոշում կայացնելիս հիմնավորման մեջ նշել էր, թե կշարունակի իր ընդդիմադիր գործունեությունը: Սարի թաղի դեպքերից հետո 8 անձ կալանավորվել է: Նրանցից 6-ն ազատ են արձակվել գրավով կամ ստորագրությամբ: Արդեն 8 ամիս է կալանքի տակ են միայն «Ոտքի Հայաստան» շարժման անդամներ Անդրիաս Ղուկասյանը եւ Դավիթ Հովհաննիսյանը: Զանգվածային անկարգություններ կազմակերպելու մեջ մեղադրվող Անդրիաս Ղուկասյանի պաշտպանը դիմել է նաեւ ՄԻԵԴ: Բողոքն ընդունվել է վարույթ եւ կքննվի առաջնահերթության կարգով՝ 2-3 ամսվա մեջ:
