Անահիտ Բախշյան. «ՀՀԿ-ն ջանք, միջոց չխնայեց»
Պատգամավորի թեկնածու Անահիտ Բաշխյանը կարծում է՝ «Ազատ դեմոկրատներ» կուսակցության քիչ տոկոս ձայներ հավաքելը կապված է նրա հետ, որ կուսակցության անունը այդքան էլ հայտնի չի եղել հասարակությանը: Ըստ նախնական տվյալների՝ «Ազատ դեմոկրատներ»-ը ստացել է 0,94% ձայն: Անահիտ Բախշյանը ռեյտինգային ընտրակարգով առաջադրվել էր նաեւ թիվ 3-րդ ընտրատարածքում: Ըստ հարցումների՝ նա այդ ընտրատարածքում 51 % ճանաչվածություն է ունեցել: «Յուրաքանչյուր մարդու մեջ ընտրելու մի մաղ է դրված, այդ մաղի անցքի տրամագիծը կախված է, նրա կրթությունից, իրավագիտակցությունից, դեպի ապագան ուղղված հիմնավոր քայլերի ընտրությունից: Հիմա ժողովուրդը ընտրեց ՀՀԿ-ին, որը ջանք, միջոց չխնայեց՝ վարչական, նյութական դիրքերը, ամեն ինչ օգտագործեցին, ներդրեցին այս անհավասար ընտրական պայքարում, չափազանց անհավասար»,- «Ա1+»-ին ասաց Անահիտ Բախշյանը: Բացի «Ազատ դեմոկրատներ»-ից, անցողիկ շեմը չեն հաղթահարել նաեւ «ՕՐՕ», «ՀԱԿ-ՀԺԿ» դաշինքները, «Հայկական վերածնունդ» եւ Հայաստանի կոմունիստական կուսակցությունները: «Կարելի է չմեկնաբանել, խնդրում եմ, հետո»,- «Ա1+»-ին ասաց Հայաստանի կոմունիստական կուսակցության առաջին քարտուղար Տաճատ Սարգսյանը: Ըստ նախնական տվյալների՝ ՀՀԿ-ն ստացել է 49,21%, «Ծառուկյան» կուսակցությունների դաշինքը 27,33, Ելքը՝ 7,75, ՀՅԴ-ն 6,59 % քվե:
