Վանո Սիրադեղյանի գործով դատապարտվածը կրկին հացադուլ է սկսել
Ցմահ ազատազրկման դատապարտված Արմեն Տեր-Սահակյանը երեկվանից կրկին հացադուլ է սկսել: Ինչպես «Ա1+»-ի հետ զրույցում նշեց նրա հարազատներից մեկը, Արմեն Տեր-Սահակյանը այդ կերպ ցանկանում է ուշադրություն հրավիրել իր գործի վրա: Նա իր բողոքն է հայտնում վաղաժամկետ ազատ արձակման դիմումը մեկ տարով հետաձգելու համար, ինչպես նաեւ պահանջում է հանդիպում Սերժ Սարգսյանի վերահսկողական ծառայության պետ Ֆելիքս Ցոլակյանի հետ: Ցմահ դատապարտյալը մոտ մեկ ամիս գտնվել էր հացադուլի մեջ եւ այն դադարեցրել է նախորդ տարվա դեկտեմբերի 31-ին՝ առողջական խնդիրների հետ կապված: Իսկ այս տարի արդեն դիմել է նաեւ Սերժ Սարգսյանին՝ խնդրելով օգտվել իր բացառիկ իրավունքից եւ ներում շնորհել իրեն: Արմեն Տեր-Սահակյանը դատապարտվել է ցմահ ազատազրկման՝ ՆԳ նախկին նախարար Վանո Սիրադեղյանի եւ մյուսների գործի շրջանակներում: