«2 օր է՝ տանիքում եմ քնում». Արթիկի բնակիչները՝ կրած վնասների մասին (տեսանյութ)
«Իմ տունն ամբողջապես խայտառակ վիճակում է, տուն չի մնացել; Երկու օր քնել եմ տանիքում, 70 տարեկան մարդ եմ ու քնում եմ տանիքում: 7 հոգանոց ընտանիքս ամեն մեկին մի հարևանի, մի բարեկամի տանը թողել եմ , որ փողոցներում չքնեն, շիվարել մնացել եմ, չգիտեմ էլ թե ինչ անեմ: Տունս մենակ պատերն ու տանիքն է մնացել, ներսում ամբողջությամբ մեկ ու կես մետրի չափ ջուր է լցվել ու լճի նման կանգնել , ամեն ինչը շուռ է տվել»,- պատմում է Արթիկի բնակիչ 70-ամյա Լյովա Մողրովյանը: Վերջինս հունիսի 24-ին Շիրակի մարզի Արթիկ քաղաքում տեղի ունեցած ջրհեղեղի տուժածներից է: Լյովա Մողրովյանի տեղեկացմամբ՝ իր կրած վնասը գնահատվել է մեկ միլիոն 900 հազար դրամի չափով, մինչդեռ նա համաձայն չէ այդչափ գումարի հետ՝ շեշտելով, որ անտուն մնալն ու այդքան փող ստանալը՝ անհամաչափ է: «Իմ վնասը շատ-շատ է, էդ մեկ միլիոնը, որ ես Արթիկում ման գամ, ինքս էլ կճարեմ, վարչապետն անձամբ եկել ու տեսել է իմ տան վիճակը ու խոստացավ, որ ինձ բնակարան կհատկացնեն, բայց ու՞ր ա, 7 հոգի ենք ու մնացել ենք դրսերում»,-իր մտահոգությունը հայտնեց նա: Արթիկի մեկ այլ բնակիչ Արտավազդ Կարախանյանի տունը թեև սելավներից չի տուժել, սակայն սելավները ավերել են նրա անասնագոմն ու քշել –տարել տասնյակ գլուխ անասուններ: «Ունեցել եմ երկու մայր խոզ՝ խոճկորներով, 1200 թև ճուտ, հավ, բադ, ղազ, 9 գլուխ հորթ: Այդքանից փրկվել է ընդամենը 11 հատ խոզ: Իմ փոխհատուցումը գնահատել են 655 հազար դրամ: Մի անգամ եկել ու լուսանկարել են իմ գոմը ու էդ մի նկարով որոշել են, որ էդքան կվճարեն: Ընդհանրապես փոխհատուցման ծրագրի մեջ էլ չեն մտցրել անասնագոմս, էդ 655 հազար դրամն էլ գրել են որպես պարիսպի փլուզում, բայց ինչ պարիսպի մասին է խոսքը, իմ մոտ պարիսպ չի փլուզվել, իմ այդքան անասուններից եմ զրկվել, ես դրանով եմ իմ ապրուստը հոգում, հիմա ես ինչ պիտի անեմ»,- վրդովված նշեց Արտավազդ Կարախանյանը: Արթիկի քաղաքապետ Արսեն Աբրահամյանը վստահեցրեց, որ հեղեղումներն առաջացել են միայն տեղումների պատճառով, որոնք միախառնվելով սարերի դեռևս չհալված ձյան հետ՝ առաջացրել են այդպիսի աննախադեպ հեղեղներ: «Աղետի պատճառն աննախադեպ առատ տեղումներն էին, որոնք եղել են Արագածի ստորոտին, Արթիկի վարչական տարածք համարվող արոտներում և շուրջ ժամ ու կես տեղացել է ինտենսիվ կարկուտ և Արթիկի բնական ջրերով ՝ խառնվելով սարերի ձյան հետ, լանջերին ավերելով խոշոր ժայռաբեկորներ, քարերի կտորներ՝ հոսել է դեպի քաղաք՝ առաջացնելով աղետալի վիճակ: Ես 15 րոպե առաջ տեղեկացված եմ եղել, որ ջրի առատ հոսք է գալիս քաղաք, բայց նման ծավալի ջրի մասին ամենադաժան երազում անգամ պատկերացնել հնարավոր չէր, որովհետև Արթիկի պատմության մեջ նման կարգի հեղեղում չէր եղել»,-նշեց Արսեն Աբրահամյանը՝ հակադարձելով նաև մեղադրանքներին, թե հեղեղատարների ոչ մաքուր լինելու պատճառով է այդ վիճակն առաջացել: Մինչդեռ լուրեր են շրջանառվում նաև, որ հեղեղի պատճառը ոչ միայն կարկուտն ու հորդառատ անձրևներն են եղել, այլև այդտեղ կառուցված ձկնաբուծարանները, որոնց փլուզված ավազանների հսկայական ծավալի ջուրն է նաև լցվել հեղեղատարները՝ նպաստելով ջրի մակարդակի բարձրացմանը: «Ա1+»-ի այս դիտարկմանը Արթիկի քաղաքապետը պատասխանեց. « Կան կադրեր, որոնք ցույց են տալիս, թե այդ ձկնաբուծարաններն ինչ մասշտաբի են և ինչ ծավալի ջուր են կարողանում տեղավորել: Դա հաստատ այն ծավալի ջուրը չէր և հաստատ էն կառույցը չէր, որի փլուզման հետևանքով հնարավոր լիներ այսպիսի հետևանքներ: Դրանք 30-40 սմ-անոց պատնեշով և շատ թեթև ջրաքանակով ձկնաբուծարաններ են, որը համեմատելի չէ քաղաք լցված ջրի քանակի հետ: Այդ ջուրը գոյացել է մինչև ձկնաբուծարաններին հասնելը»: Տարածքային կառավարման և զարգացման նախարարության վարչական վերահսկողության և համայնքային ծառայության հարցերով վարչության պետ Արթուր Սողոմոնյանն էլ իր հերթին վստահեցրեց, որ ստեղծվել է վնասների գնահատման և փոխհատուցման համապատասխան հանձնաժողով: Անդրադառնալով այն մեղադրանքներին, թե բոլոր ուժերը կենտրոնացած են եղել այդ օրը Հռոմի պապի այցելության վրա և բավարար չափով ուշադրություն չի դարձվել և ուժերը չեն մոբիլիզացվել Արթիկում կատարվածին , Արթուր Սողոմոնյանը հակադարձեց. «Հռոմի պապի այցելությամբ պայմանավորված միջոցառումները չեն խոչընդոտել Արթիկում կատարվող գործողություններին: Մենք շուրջօրյա աշխատանքներ ենք իրականացնում այնտեղ: Արթիկում ոչ թե կարճաժամկետ , այլ միջնաժամկետ ու երկարաժամկետ գործողություններ պետք է իրականացվեն՝ ամբողջական հետևանքները տեսնելու և դրանք վերացնելու ուղղությամբ»,-ասաց նա: Վերջինս նաև նկատեց, որ Կառավարության երեկվա նիստում հայտարարվել է, որ 42 միլիոն դրամ է հատկացվելու Արթիկի քաղաքացիներին՝ վնասների աջակցության նպատակով, որից 22 միլիոնը՝ շենք-շինությունները վերականգնելու համար է նախատեսված:
