Գեւորգ Ղազարյանը տեղափոխվեց «Օլիմպիակոս»
Հայաստանի հավաքականի կիսապաշտպան Գեւորգ Ղազարյանը նոր մրցաշրջանից հանդես կգա Պիրեյի «Օլիմպիակոս»-ում:
Ինչպես տեղեկացնում է Հունաստանի ամենատիտղոսակիր թիմի պաշտոնական կայքը, հայազգի ֆուտբոլիստի հետ երեք տարվա պայմանագիր է կնքվել:
Գեւորգ Ղազարյանն ակումբի հեռուստաալիքին տված հարցազրույցում նշել է, որ անչափ հպարտ է, որ հանդես է գալու «Օլիմպիակոս»-ում:
«Ես տեղյակ եմ, որ «Օլիմպիակոսի» երկրպագուները անչափ հավատարիմ են թիմին: Ես ամեն ինչ կանեմ նրանց սպասելիքները արդարացնելու համար, կաշխատեմ սովորել հունարեն, որպեսզի շփվեմ նրանց հետ» - նշել է 26-ամյա ֆուտբոլիստը:
Նշենք, որ Գեւորգ Ղազարյանը մինչ այդ տեղափոխությունը հանդես էր գալիս Դոնեցկի «Մետալուրգ»-ում, որը Ուկրաինայում տեղի ունեցող քաղաքացիական պատերազմի պատճառով հայտնվել է լուծարման եզրին:
