Արման Սերեբրակյանը 3-րդ տեղն է զբաղեցրել
Ամերիկահայ լեռնադահուկորդ Արման Սերեբրակյանը բրոնզե մեդալ է նվաճել միջազգային վարկանիշային մրցաշարում: Այդ մասին տեղեկացնում է Հայաստանի դահուկային սպորտի ֆեդերացիայի մամուլի քարտուղարությունը:
Հայաստանի դրոշի տակ հանդես եկող լեռնադահուկորդը ԱՄՆ-ում կայացած մեծ ոլորավայրէջքի մրցումներում 2:10.38 արդյունքով գրավել է 3-րդ տեղը: Նա ետ է մնացել միայն ամերիկացի Պետեր Մարտենսից եւ կանադացի Բրայան Կուկսոնից:
Ֆեդերացիայի մամուլի քարտուղարությունը նաեւ հայտնում է, որ մեր լեռնադահուկային սպորտի հավաքականի անդամներ Արսեն Ներսիսյանը, Յուրա Մանուկյանը, Քաջիկ Վարդանյանը եւ Եվա Պապոյանը դեկտեմբերի 14-20-ը Թուրքիայում կմասնակցեն միջազգային վարկանիշային մրցաշարերի:
Դահուկավազքի հավաքականի անդամներ Սերգեյ Միքայելյանը, Արթուր Եղոյանը, Թադեւոս Պողոսյանը եւ Սյուզաննա Վարոսյանը դեկտեմբերի 13-15-ը կմասնակցեն Ֆինլանդիայի Վուոկատի բնակավայրում անցկացվող Սկանդինավիայի գավաթի մրցավազքին:
Իսկ ահա գյումրեցի դահուկորդներ Աննա Մխիթարյանը, Կատյա Գալստյանը եւ Լիլիթ Տոնոյանը իրենց ուժերը կփորձեն Ավստրիայում կայանալիք միջազգային վարկանիշային մրցաշարում:
