«Մենք տուրիստներ չենք»
«Մենք տուրիստ չենք եւ բոլոր խաղերին էլ դաշտ ենք մտնում հաղթելու նպատակով: Ոչ ոք չի կարող մեզ մեղադրել մրցակիցներին միավորներ բաժանելու մեջ» - այսօր կազմակերպած մամուլի ասուլիսում հայտարարեց Մալթայի ֆուտբոլի ազգային թիմի գլխավոր մարզիչ Պիետրո Ջեդինը, որը պատրաստվում է վաղը Երեւանում կայանալիք Հայաստանի հավաքականի հետ խաղին:
Ճիշտ է, իտալացի մասնագետը միաժամանակ խոստովանեց, որ իրենք շատ ուրախ կլինեն, եթե Երեւանից Մալթա վերադառնան ընդամենը մեկ միավորով:
«Հայաստանի հավաքականը ուժեղ կազմ ունի: Մրցակցի բոլոր ֆուտբոլիստներն էլ վտանգավոր են»:
Պիետրո Ջեդինը կարծում է, որ եթե Հայաստանի հավաքականը ցույց տա այնպիսի ֆուտբոլ, ինչպես դա արեց Եվրո-2012-ի ընտրական մրցաշարի վերջում, ապա խմբում կրկին կարող է պայքարել 2-րդ տեղի համար:
Հիշեցնենք, որ 2014 թվականի ֆուտբոլի աշխարհի առաջնության Հայաստան - Մալթա ընտրական հանդիպումը տեղի կունենա հունիսի 7-ին, «Հանրապետական» մարզադաշտում:
