Յուրա Մովսիսյանը կխաղա Մոսկվայի «Սպարտակում»
Հայաստանի հավաքականի եւ ռուսական «Կրասնոդարի» հարձակվող Յուրա Մովսիսյանը 5 տարվա պայմանագիր է կնքել Մոսկվայի «Սպարտակ» ակումբի հետ:
Ինչպես տեղեկացնում է «Սովետսկի սպորտ» թերթը, 25-ամյա ֆուտբոլիստը երեքշաբթի 4 ժամյա բուժզննում է անցել Մոսկվայի կլինիկաներից մեկում: Այն ցույց է տվել, որ Յուրա Մովսիսյանը դեռեւս չի վերականգնվել այս ամսվա սկզբում ստացած վնասվածքից:
Այդ իսկ պատճառով պայմանագրի ստորագրումը մեկ օրով հետաձգվել է: Երեկ երեկոյան երկու ակումբները համաձայնության են եկել եւ պայմանագիր են կնքել: Ըստ դրա Մոսկվայի «Սպարտակը» 7,5-8 մլն եվրո փոխհատուցում կվճարի «Կրասնոդարին»:
Հիշեցնենք, որ Յուրա Մովսիսյանը Ռուսաստան էր տեղափոխվել 2011 թվականի հունվարին, որի համար կրասնոդարյան ակումբը 2 մլն եվրո էր վճարել դանիական «Ռանդերս» ակումբին: Դա նշանակում, որ երկու տարում մեր ֆուտբոլիստի ինքնարժեքը բարձրացել է մոտ 4 անգամ:
