Վարդան Այվազյան. «Հիմա սա թանկացու՞մ է»
ԱԺ տնտեսական հարցերի մշտական հանձնաժողովը չի պատրաստվում գազի հնարավոր թանկացմանն ընդառաջ գների աճը մեղմելու սոցիալական մեխանիզմներ մշակել: Ավելին' հանձնաժողովի նախագահ, ՀՀԿ-ական Վարդան Այվազյանը «Ա1+»-ի հետ զրույցում հայտարարում է, թե գազի թանկացում դեռ չկա, կլինի, հետո կխոսենք: Ներկայացնում ենք ԱԺ տնտեսական հարցերի հանձնաժողովի նախագահի հետ մեր զրույցը:
- Պարոն Այվազյան, Ձեր ղեկավարած հանձնաժողովն ի՞նչ օրենքներ է այսօր մշակում, որ հնարավոր լինի ինչ-որ կերպ զսպել գնաճը Հայաստանում' հատկապես երբ գազի թանկացում է սպասվում:
- Շուկայական տնտեսություն է: Մենք աշխատում ենք, որ մոնոպոլ երեւույթներ տեղի չունենան, գերիշխող դիրքի չարաշահում տեղի չունենա: Մնացածն առաջարկի եւ պահանջարկի շրջանակներում է ձեւավորվում:
- Սակայն փաստորեն չեք կարողանում պայքարել երեւույթների դեմ: Մոնոպոլիստները մնում են իրենց դիրքերում:
- Դա ձեր կարծիքն է:
- Կառավարության ծրագրում լուրջ խոստումներ կան, սակայն այսօր արդեն իսկ ակնհայտ է, որ թանկացումները Հայաստանում ավելանում են, օր -օրի գների նոր թանկացումներ են գրանցվում:
- Ավելացում չկա: Հնարավոր է ներկրվող ապրանքների պահով դոլար- դրամ արտահայտությամբ սղաճի շրջանակներում ավելացում տեղի ունենա: Օրինակ' շաքարավազը 2009-2012-ի համեմատությամբ թանկացել է 125 դրամով: Իսկ դոլար-դրամային արտահայտությունն ավելացվել է 25 տոկոսով: 125 դրամը 12.5 տոկոս է, իսկ դոլարը թանկացել է 25 տոկոսով: Հիմա սա թանկացու՞մ է, թե թանկացում չի:
- Ուզում եք ասել' շաքարավազը քիչ է թանկացել, պիտի ավելի շա՞տ թանկանար:
- Ես չեմ կարող ասել, որովհետեւ դա միանշանակ պետք է տեղի ունենա առաջարկի եւ պահանջարկի շրջանակներում:
- Պարոն Այվազյան, եթե վաղը գազը թանկանա, հայ սպառողը ի՞նչ պիտի անի, սոցիալական պաշտպանվածության որեւէ մեխանիզմ ԱԺ-ն մշակո՞ւմ է:
- Գազի թանկացման դեպքում կարող է տեղի ունենալ միայն փոխհատուցում սոցիալական խոցելի խմբերին: Իսկ մնացածն ի՞նչ եք առաջարկում: Ինդեքսավորում եւ սոցիալական խոցելի խմբերին դոտացիաների վճարում. սա է: Իսկ գազի թանկացման հիմքերը ո՞րն է: Ինձ համար անհասկանալի է: Դուք տեղեկացված եք, որ գազը թանկանո՞ւմ է:
- Արդեն տարբեր հայտարարություններ են եղել, պարոն Այվազյան: Փաստորեն, ԱԺ-ն չի մտահոգվում, ոչինչ չի անում ու ժողովուրդը կրկին մենա՞կ է մնալու գազի թանկացման պարագայում:
- Դա ձեր կարծիքն է: Իսկ դուք ի՞նչ եք անում:
- Մենք ժողովրդին հուզող հարցերն ենք բարձրաձայնում, պարոն Այվազյան:
- Да ты что:
Զրուցեց Մարինե Խառատյանը
