Լավագույնը Վլադիմիր Հակոբյանն է
Պլովդիվում ընթացող շախմատի տղամարդկանց Եվրոպայի անհատական առաջնությունում Հայաստանի շախմատիստներից առավել հաջող է հանդես գալիս մեր փորձառու գրոսմայստեր Վլադիմիր Հակոբյանը:
Հաշվետու տուրում նա սպիտակներով հաղթեց Էստոնիայի առաջատար գրոսմայստեր Կայդո Կուլաոտսին եւ իր միավորների քանակը հասցրեց 5,5-ի: Վլադիմիր Հակոբյանը առայժմ կես միավորով է ետ մնում միանձնյա առաջատար, բելառուսցի շախմատիստ Սերգեյ Ազարովից:
Այսօր կայանալիք 8-րդ տուրում Վլադիմիր Հակոբյանը սպիտակներով կհանդիպի ռուսաստանցի Դենիս Խիսմատուլինի հետ:
Մրցաշարում երրորդ հաղթանակը տարավ Գաբրիել Սարգսյանը, որը պարտության մատնեց խորվաթ Դավորին Կուլյաշեւիչին: Նա 5 միավորով զբաղեցնում է 35-րդ տեղը:
Մեր մյուս շախմատիստները անհաջող հանդես եկան այս տուրում եւ զիջեցին դիրքերը:
Հիշեցնենք, որ Եվրոպայի անհատական առաջնությունը անցկացվում է շվեյցարական մրցակարգով, 11 տուրով:
