«Իմպուլսը» մրցեց Ռուսաստանի ետնապահի հետ
Ֆուտբոլի Հայաստանի բարձրագույն խմբի մասնակից Դիլիջանի «Իմպուլսը» այսօր երկրորդ ստուգողական հանդիպումը անցկացրեց Սոչիում, որտեղ մեր թիմը ուսումնամարզական հավաք է անցկացնում:
Մեր ֆուտբոլիստները ուժերը փորձեցին Ռուսաստանի Պրեմիեր լիգայի ետնապահ «Տոմի» հետ: Ինչպես տեղեկացնում է ռուսական ակումբի կայքէջը, խաղը անցել է երկուստեկ գրոհների ներքո:
Հանդիպման 18-րդ րոպեին «Իմպուլսը» մրցակցին հաղթում էր 3:1 հաշվով, սակայն մինչեւ ընդմիջում «Տոմին» հաջողվել է վերականգնել հավասարակշռությունը: Ընդմիջումից հետո մեր ֆուտբոլիստները կրկին առաջ են անցել հաշվի մեջ, բայց հետագայում եւս երկու գոլ են բաց թողել եւ պարտվել 4:5 հաշվով: Այս խաղով մեր թիմն ավարտեց իր սեւծովյան ուսհավաքը:
Հիշեցնենք, որ ստուգողական առաջին խաղում «Իմպուլսը» զիջել էր ՌԴ-ի 2-րդ դիվիզիոնում հանդես եկող Ստավրոպոլի «Դինամոյին» (0:2):
