Վրաստանը գերազանց հարաբերություններ ունի Հայաստանի, Ադրբեջանի և Թուրքիայի հետ և միաժամանակ ակտիվորեն զարգացնում է կապերը Կենտրոնական Ասիայի երկրների հետ։ Այդ մասին Տաջիկստանում լրագրողների հետ զրույցում հայտարարել է Վրաստանի վարչապետ Իրակլի Կոբախիձեն։

 

Նրա խոսքով՝ Կենտրոնական Ասիայի երկրների հետ համագործակցության խորացումը հատուկ նշանակություն ունի, քանի որ Վրաստանը յոթ երկիր կապում է Սև ծովի և, համապատասխանաբար, արևմտյան տարածքի հետ։ Վարչապետը նշել է, որ առևտրատնտեսական տեսանկյունից կարևոր է լիարժեք օգտագործել այդ ներուժը։

 

Կոբախիձեն հիշեցրել է, որ վերջերս այցելել է Ղրղզստան, շուտով կայցելի Ղազախստան, իսկ հուլիսին Վրաստան կայցելեն Ուզբեկստանի և Թուրքմենստանի նախագահները։

 

Վրաստանի վարչապետի գնահատմամբ՝ այս գործընթացները կնպաստեն երկրի տարանցիկ գործառույթի ամրապնդմանը և տնտեսական ներուժի առավել արդյունավետ օգտագործմանը, ինչը կառավարության հիմնական առաջնահերթություններից մեկն է։