Բարեգործական համերգ մանուկների համար Tashir Arena-ում՝ Սամվել Կարապետյանի 60-ամյակի առիթով (տեսանյութ)
Աջակցիր «Ա1+»-ինՕգոստոսի 18-ին Երևանում, նորոգված կրկեսի շենքում տեղակայված Tashir Arena-ում, կայացավ բարեգործական համերգ «Երեխաները՝ երեխաների համար» խորագրով։ Միջոցառումը կազմակերպվել էր «Տաշիր» բարեգործական հիմնադրամի նախագահ, գործարար Սամվել Կարապետյանի նախաձեռնությամբ՝ նրա 60-ամյակի կապակցությամբ։
Կարապետյանը ծննդյան տոնը որոշել էր նվիրել մանուկներին՝ առաջին անգամ նրանց համար բացելով Արենայի դռները։ Միջոցառմանը մասնակցեցին ավելի քան 1200 երեխա Հայաստանի տարբեր քաղաքներից ու մարզերից՝ Վանաձորից, Շիրակից, Հրազդանից, Արտաշատից, Արարատից, Երևանից և այլ վայրերից։
Համերգի գաղափարը կյանքի էր կոչվել Կարապետյանի դստեր՝ Տաթևիկ Կարապետյանի ջանքերով։ Իր խոսքում նա երեխաներին կոչ արեց համարձակորեն երազել և հավատալ հրաշքներին.
«Երազանքները թևեր են, որոնք օգնում են թռչել։ Այսօր իմ երազանքը իրականություն դարձավ, որովհետև դուք այստեղ եք։ Մի դադարեք երազել և գործել», – ասաց նա։
Համերգին մասնակցեցին երիտասարդ արտիստներ ու մանկական խմբեր, որոնք բեմ բարձրացան իրենց հասակակիցների համար։
Տաթևիկ Կարապետյանը նշեց, որ խորհրդանշական է, որ հենց երեխաները լցրեցին Արենայի դահլիճը ծիծաղով ու ուրախությամբ․ «Թող առաջին ձայնը, որ հնչեց այստեղ, դառնա մանկական ծիծաղը՝ որպես ամենակարևոր ազդանշան, որ մենք ճիշտ ուղու վրա ենք»։
📌 Նշենք, որ օգոստոսի 18-ի համերգը պաշտոնական բացում չէր․ Tashir Arena-ի բացման հանդիսավոր արարողությունը և ծրագրային ներկայացումները կանցկացվեն այս աշնանը։
