Ու՞մ համար է հատկապես վտանգավոր շոգը

Առողջապահության նախարարությունից հայտնում են․

Բարձր ջերմաստիճանը և օդի խոնավության մակարդակը կարող են ծանրացնել սրտանոթային համակարգի աշխատանքը և առաջացնել լուրջ բարդություններ: Այս սեզոնին կարող են ավելանալ ինչպես զարկերակային գերճնշում, այնպես էլ` սրտի իշեմիկ հիվանդություն ունեցող անձանց հոսպիտալացումները:

Հիմնական վտանգները.
 տեղի է ունենում ծայրամասային անոթների լայնացում, որը բերում է մաշկի և օրգանիզմի ամբողջ մակերեսային հատվածի արյունամատակարարման ավելացման, ինչը կարող է իջեցնել զարկերակային ճնշումը,
 մեծանում է քրտնարտադրությունը, ինչի շնորհիվ օրգանիզմը կարողանում է պահել իրեն անհրաժեշտ ջերմային ռեժիմը, սակայն կարող է առաջանալ ջրազրկում,
 մեծանում է թրոմբոզների հավանականությունը օրգանիզմում,
 էլեկտրոլիտների դեֆիցիտ, որի հետևանքով կարող են առաջանալ առիթմիաներ, սրտի աշխատանքի տարբեր տեսակի խանգարումներ՝ ընդհուպ մինչև կյանքին վտանգ սպառնացող:

Ու՞մ համար է հատկապես վտանգավոր շոգը.
 Սրտային անբավարարություն ունեցողներ,
 Ցածր կամ բարձր զարկերակային ճնշում ունեցողներ,
 Սրտի իշեմիկ հիվանդություն ախտորոշմամբ անձինք,
 Սրտի ռիթմի խանգարումներ ախտորոշմամբ անձինք,
 Տարեցներ, որոնց ջերմակարգավորման մեխանիզմներն ավելի թույլ են:

Խորհուրդներ
 Հեղուկների ընդունում, հատկապես մաքուր ջուր։ Խուսափել ալկոհոլից և սուրճից։ Անհրաժեշտության դեպքում համաձայնեցնել հեղուկի օգտագործման քանակը բուժող բժշկի հետ:
 Խուսափել բարձր ջերմաստիճանի ժամերին դուրս գալուց (ժ.11:00–17:00):
 Պահպանել դեղերի ընդունման ժամանակացույցը և խորհրդակցել բժշկի հետ՝ արդյո՞ք անհրաժեշտ է հարմարեցնել դեղաչափը շոգ եղանակին։
 Մնալ սառը կամ օդափոխվող տարածքներում։
 Հետևել արյան ճնշմանը և սրտի զարկերին՝ անհրաժեշտության դեպքում` խորհրդակցել բժշկի հետ։

 ԱՆ Խորհրդատու սրտաբանության գծով
Համլետ Հայրապետյան