Իսպանիան և Պորտուգալիան մնացել են առանց էլեկտրաէներգիայի
Աջակցիր «Ա1+»-ինԻսպանիայում և Պորտուգալիայում արձանագրվել է լայնածավալ էլեկտրաէներգիայի անջատում։ Խախտվել է երկաթուղային և ավտոմոբիլային երթևեկությունը, չեն գործում լուսացույցերը։ Դեպքի պատճառները պարզվում են։
Իսպանական և պորտուգալական էլեկտրական ընկերությունները պարզում են լայնածավալ հոսանքազրկման պատճառները, որը տեղի է ունեցել Իսպանիայի ժամանակով կեսօրից հետո։ Անջատումը ազդել է մայրցամաքային Իսպանիայի, Պորտուգալիայի, ինչպես նաև Ֆրանսիայի և Անդորրայի որոշ շրջանների վրա։
Ըստ հաղորդումների, միլիոնավոր մարդիկ Պիրենեյան թերակղզում մնացել են առանց էլեկտրաէներգիայի։
Իսպանիայի կառավարությունը հրավիրել է շտապ խորհրդակցություն։
Պորտուգալիայի իշխանությունները ստեղծել են աշխատանքային խումբ՝ իրավիճակի մոնիտորինգի համար։ Նշվում է, որ խնդիրը կարող էր առաջանալ «երկրի սահմաններից դուրս»։ Պիրենեյան թերակղզու հիվանդանոցները աշխատում են գեներատորներով։
Էլեկտրաէներգիա չկա նաև Եվրոպայի խոշորագույն օդանավակայաններից մեկում՝ Մադրիդի Բարախասում։ Տուժած ուղևորները ստիպված են սպասել ինքնաթիռներում, գրել է նրանցից մեկը։
Euronews Պորտուգալիայի տվյալներով՝ էլեկտրաէներգիայի անջատումը անակնկալ է եղել երկրի բնակիչների համար. հարյուրավոր ուղևորներ արգելափակվել են մետրոյի թունելներում Լիսաբոնում և Մադրիդում, ինչպես նաև այլ քաղաքներում, որտեղ չկա հոսանք։
Հայտնի է, որ Կանարյան կղզիներում, Սեուտայում և Մելիլիայում էլեկտրաէներգիայի մատակարարման խնդիրներ չկան։
Իսպանական լրատվամիջոցների հաղորդմամբ՝ Ֆրանսիայի հարավ-արևմուտքում բռնկված հրդեհը, որը վնասել է Պերպինյանի և արևելյան Նարբոնիայի միջև գտնվող բարձր լարման էլեկտրահաղորդման գիծը, կարող էր լինել հոսանքազրկման հնարավոր պատճառը։
Մեր լրագրողները շարունակում են աշխատել թեմայի վրա, և նոր տվյալների ի հայտ գալուն պես նյութը կթարմացվի։
