Իսպանական առավելութուն, գերմանական՝ ֆիասկո. ՈՒԵՖԱ-ի ակումբային մրցաշարեր

ՈՒԵՖԱ-ի ակումբային մրցաշարերում կայացան խմբային փուլի 2-րդ տուրի հանդիպումները:

Եվրոպայի առաջատար 5 երկրներից առավել վստահ հանդես եկան Իսպանիայի ակումբները, որոնք 7 խաղում տարան 6 հաղթանակ: Չեմպիոնների լիգայում Մադրիդ «Ռեալը» հյուրընկալվելիս հաղթել է Իտալիայի չեմպիոն «Նապոլիին»՝ 3:2, «Ռեալ Սոսիեդադը»՝ ավստրիական «Զալցբուրգին»՝ 2:0, «Բարսելոնան»՝ պորտուգալական «Պորտոյին»՝ 1:0: Մադրիդի «Աթլետիկոն» իր հարկի տակ կամային հաղթանակ է տոնել Նիդեռլանդների «Ֆեյենորդի» նկատմամբ՝ 3:2: «Սևիլյան» մրցակցի հարկի տակ ոչ-ոքի է խաղացել Նիդեռլանդների ՊՍՎ-ի հետ՝ 2:2: Եվրոպայի լիգայում «Բետիսը» սեփական դաշտում հաղթել է չեխական «Սպարտային»՝ 2:1, «Վիլյառեալը»՝ ֆրանսիական «Ռենին»՝ 1:0:

Հաղթանակների քանակով երկրորդ տեղում Անգլիան է: Չեմպիոնների լիգայում «Նյուքասլը» սեփական դաշտում ջախջախել է Ֆրանսիայի չեմպիոն «ՊՍԺ»-ին՝ 4:1, իսկ «Մանչեսթեր Սիթին» հյուրընկալվելիս պարտության է մատնել գերմանական «Լայպցիգին»՝ 3:1: «Մանչեսթեր Յունայթեդը» իր հարկի տակ պարտվել է թուրքական «Գալաթասարային»՝ 2:3, իսկ Լոնդոնի «Արսենալը» Ֆրանսիայում զիջել է «Լանսին»՝ 1:2:

Եվրոպայի լիգայում Լոնդոնի «Վեսթ Հեմը» հաղթել է գերմանական «Ֆրայբուրգին»՝ 2:1, «Լիվերպուլը»՝ բելգիական «Ունիոնին»՝ 2:0, իսկ «Բրայթոնը» ոչ-ոքի է խաղացել ֆրանսիական «Մարսելի» հետ՝ 2:2:

Իտալիայի ակումբները ընթացիկ տուրում տարել են 4 հաղթանակ, 2 խաղ ավարտել են ոչ-ոքի և կրել են 1 պարտություն: Միակ անհաջողակը երկրի չեմպիոն «Նապոլին» է: Միլանի «Ինտերը» հաղթել է «Բենֆիկային»՝ 1:0, իսկ Հռոմի «Լացիոն»՝ շոտլանդական «Սելթիկին»՝ 2:1: «Միլանն» ոչ-ոքի է խաղացել Դորտմունդի «Բորուսիայի» հետ՝ 0:0: Մյուս լիգաներում Հռոմի «Ռոման» սեփական դաշտում ջախջախել է շվեյցարական «Սերվետին»՝ 4:0, «Ատալանտան» հաղթել է պորտուգալական «Սպորտինգին»՝ 2:1, իսկ «Ֆիորենտինան» ոչ-ոքի է խաղացել Հունգարիայի չեմպիոն «Ֆերենցվարոշի» հետ՝ 2:2:

Առաջատար հնգյակից առավել վատ հանդես են եկել գերմանական ակումբները, որոնք 7 խաղում կրել են 4 պարտություն: Այսպես՝ Բեռլինի «Ունիոնը» սեփական դաշտում զիջել է պորտուգալական «Բրագային»՝ 2:3, չնայած սկզբում ունեցել է 2 գնդակի առավելություն: «Այնտրախտը» Հունաստանում 1:2 հաշվով պարտվել է ՊԱՕԿ-ին: Հաղթանակ են տարել միայն Մյունխենի «Բավարիան» («Կոպենհագեն»՝ 2:1) և Լևերկուզենի «Բայերը» («Մյոլդե»՝ 2:1):

Երկու խոսք Հայաստանի ֆուտբոլիստների ելույթների մասին: Կոնֆերենցիաների լիգայում մեր հավաքականի հարձակվող Տիգրան Բարսեղյանի թիմը՝ Սլովակիայի «Սլովանը», հյուրընկալվելիս 1:0 հաշվով հաղթել է Սլովենիայի «Օլիմպիային»: Ղազախական «Աստանան», որտեղ հանդես են գալիս մեր հավաքականի պաշտպաններ Վարազդատ Հարոյանն ու Կամո Հովհաննիսյանը, սեփական դաշտում 1:2 հաշվով պարտվել է չեխական «Պլզենին»: Հենրիխ Մխիթարյանի «Ինտերն» առաջին հաղթանակն է տոնել չեմպիոնների լիգայում:

ՈՒԵՖԱ-ի ակումբային մրցաշարերի խմբային փուլի 3-րդ տուրի հանդիպումները կկայանան հոկտեմբերի 24-ին, 25-ին և 26-ին: