ԱՄՆ-ի հերթն է, թե ինչ միջոցներ է կիրառելու՝ դադարեցնելու ագրեսիան․ Մարուքյան
Աջակցիր «Ա1+»-ինՀայաստանի հատուկ հանձնարարություններով դեսպան Էդմոն Մարուքյանի գրառումը․
«Օրեր առաջ ԱՄՆ Սենատի արտաքին հարաբերությունների հանձնաժողովում ԱՄՆ պետքարտուղարի եվրոպական հարցերով օգնականի պաշտոնակատար Յուրի Քիմը հայտարարել է, որ «Միացյալ Նահանգները չի հանդուրժի Լեռնային Ղարաբաղից հայերին «էթնիկական մաքրման» որևէ փորձ»:
Այժմ Ադրբեջանը լայնածավալ ագրեսիա և ռազմական գործողություն է սկսել Լեռնային Ղարաբաղի խաղաղ ժողովրդի դեմ։ Այժմ ԱՄՆ-ի հերթն է, թե ինչ միջոցներ են կիրառելու՝ դադարեցնելու ագրեսիան և ռազմական հարձակումը թակարդում գտնվող և սովամահ մարդկանց վրա։
Բնականաբար, Ադրբեջանը հերթական ռազմական հանցագործությունն է կատարում՝ ի լրումն էթնիկ զտումների՝ սպանելով խաղաղ և անպաշտպան մարդկանց։ Այս ամենը պետք է դատապարտվի ու դադարեցվի իր բոլոր հետեւանքներով»։
Նշենք՝ Ադրբեջանի պաշտպանության նախարարությունը հայտարարել է, թե Լեռնային Ղարաբաղի վտանգավոր գոտիներից խաղաղ «բնակչության տարհանումն ապահովելու համար Լաչինի միջանցքում և այլ ուղղություններով ստեղծվել են մարդասիրական միջանցքներ և ընդունման կետեր», ինչը հայերի «էթնիկական մաքրման» ապացույցներից է։
Իսկ Ադրբեջանի նախագահի օգնական Հիքմաթ Հաջիևը հայտարարել է, որ ԼՂ-ում բնակվող հայերին հեռախոսային տեքստային հաղորդագրությամբ տեղեկացվել է, որ նախատեսվում է իրականացնել «տեղային բնույթի հակաահաբեկչական գործողություն»՝ թիրախում ունենալով ռազմական նշանակության օբյեկտների եւ ենթակառուցվածքների՝ շարքից դուրս բերումն ու ոչնչացումը։
