Հայաստանը ոսկե մեդալներ է նվաճել խուլերի ըմբշամարտի աշխարհի առաջնությունում

Սեպտեմբերի 3-ից Ղրղըզստանի մայրաքաղաք Բիշքեկում մեկնարկած խուլերի ըմբշամարտի մեծահասակների, երիտասարդների և պատանիների աշխարհի առաջնությունում Հայաստանի ներկայացուցիչներն արդեն նվաճել են 2 ոսկե և 1 բրոնզե մեդալ: Այդ մասին տեղեկացնում է ԿԳՄՍ նախարարությունը:

Մեծահասակների պայքարում հաղթող է ճանաչվել Սենիկ Սերոբյանը: Պատանիների պայքարում ոսկե մեդալի է արժանացել հունահռոմեական ոճի ըմբիշ, 50 կգ քաշային Արման Ասատրյանը: 55 կգ քաշային Գևորգ Սողոյանը դարձել է բրոնզե մեդալակիր:

Հայաստանի հունահռոմեական ոճի ըմբշամարտի պատանիների հավաքականը թիմային հաշվարկում գրավել է 3-րդ տեղը:

Հայաստանի թիմը կազմված է 14 մարզիկից: Խուլերի ըմբշամարտի աշխարհի առաջնությունը կավարտվի սեպտեմբերի 11-ին: