Հրայր Ուլուբաբյանը մեղադրյալի աթոռին է
Աջակցիր «Ա1+»-ինՀրապարախոս Հրայր Ուլուբաբյանը հայտնվել է մեղադրյալի աթոռին։ Նա մեղադրվում է դիտավորությամբ Երևան քաղաքի առաջին ատյանի ընդհանուր իրավասության դատարանի կողմից ԵԴ/25501/02/20 քաղաքացիական գործով կայացված և 18.04.2022թ. օրինական ուժի մեջ մտած դատական ակտը չկատարելու համար։ Գործը մակագրվել է Երեւան քաղաքի ընդհանուր իրավասության դատարանի դատավոր Ժորա Չիչոյանին։
Ըստ «Դատալեքսի» հրապարակախոս Հրայր Ուլուբաբյանը չի հերքել Ռազմիկ Արշալույսի Աբրահամյանի վերաբերյալ «Ճանաչված հրապարակագիրը փնտրում է ենթադրյալ վաճառված իր երեխային» վերտառությամբ հոդվածում ներկայացված զրպարտչական փաստացի տվյալները, այն է՝ Հանրապետական հիվանդանոցի ծննդատան բժիշկների խումբը՝ Ռազմիկ Աբրահամյանի գլխավորությամբ, նորածին որդուn գողացել ու վաճառել են:
Չի հերքել նաեւ Հանրային Հեռուստաընկերության «Երեխաներին ծնողներից փողով բաժանած հանցագործությունների աշխարհագրությունը՝ ՔԿ-ում» ռեպորտաժի ընթացքում ներկայացված զրպարտչական փաստացի տվյալները:
Հրայր Ուլուբաբյանը չի վճարել նաեւ զրպարտության համար փոխհատուցման գումարը։
Հիշեցնենք, որ Ռազմիկ Աբրահամյանը եւս ամբաստանյալի աթոռին է։ Նա մեղադրվում է «երեխաների ապօրինի վաճառքի» գործով։ Այս գործով ընդհանուր անցնում է 11 անձ եւ այն քննվում է դռնփակ։
Ռազմիկ Աբրահամյանը մեկ այլ գործով էլ մեղավոր է ճանաչվել ՀՀ առողջապահության նախարարի տեղակալ Արսեն Դավթյանին առանձնապես խոշոր չափերով կաշառք տալու մեջ: Նրա նկատմամբ սահմանվել է փորձաշրջան՝ 2 երկու տարի ժամկետով:
