Պետնախարարը նորանշանակ նախարարներին ներկայացրել է աշխատակազմերին (տեսանյութ)
Աջակցիր «Ա1+»-ին Արցախի Հանրապետության պետական նախարար Ռուբեն Վարդանյանը հունվարի 11-ին Արցախի Հանրապետության արտաքին գործերի նախարարության ղեկավար կազմին է ներկայացրել նորանշանակ ԱԳ նախարար Սերգեյ Ղազարյանին, որը մինչ այդ զբաղեցնում էր Հայաստանի Հանրապետությունում Արցախի Մշտական ներկայացուցչի պաշտոնը։
Ինչպես տեղեկացրին Արցախի Հանրապետության արտգործնախարարությունից, պետական նախարարը նախ շնորհակալություն է հայտնել Դավիթ Բաբայանին 2020 թվականի պատերազմից հետո՝ դժվարին ժամանակաշրջանում արտաքին գերատեսչության ղեկավարի պատասխանատու պաշտոնը ստանձնելու և իր առաքելությունն ազնվորեն իրականացնելու համար։ Այնուհետև երախտագիտություն է հայտնել Սերգեյ Ղազարյանին Ադրբեջանի կողմից Արցախի շրջափակման ճգնաժամային պայմաններում նախարարի պաշտոնում նշանակվելու բարդ որոշումն ընդունելու համար։
Ըստ աղբյուրի՝ Սերգեյ Ղազարյանը ևս շնորհակալություն է հայտնել Դավիթ Բաբայանին՝ պատերազմից անմիջապես հետո նման պատասխանատու առաքելությունը ստանձնելու համար և նշել, որ պատրաստ է անել առավելագույնը՝ պատվով հաղթահարելու առաջացած դժվարությունները։
«Խոսելով ստեղծված իրավիճակում երկրի համար կարևորագույն ուղղությունների մասին՝ պետնախարարն առանձնացրել է երեք նպատակ՝ պահպանել Արցախի սուբյեկտայնությունը, ապահովել անվտանգությունը և աշխատել, որպեսզի Արցախը հայտնվի արտաքին աշխարհի ուշադրության կենտրոնում։
Ռուբեն Վարդանյանն ընդգծել է, որ առաջիկայում այդ նպատակների իրագործմանն են ուղղվելու բոլորի և, մասնավորապես, Արցախի ԱԳՆ ջանքերը»,- ասվում է հաղորդագրության մեջ։
ԱԳ նորանշանակ նախարարը, Արցախի Հանրապետության շրջափակմամբ պայմանավորված, առայժմ իր գործունեությունը կիրականացնի Հայաստանից։
