A
A
Լեռնային Ղարաբաղը գազ մատակարարող խողովակաշարի խափանման մասին տեղեկատվությունը խիստ մտահոգիչ է․ Մարինա Կալյուրանդ
Աջակցիր «Ա1+»-ինԵվրախորհրդարանում Հարավային Կովկասի հետ հարաբերությունների հարցերով պատվիրակության ղեկավար, պատգամավոր Մարինա Կալյուրանդի հայտարարությունը Լաչինի միջանցքի արգելափակման վերաբերյալ․
«Լրջորեն մտահոգված եմ դեկտեմբերի 3-ին, իսկ այնուհետև՝ դեկտեմբերի 12-ից ի վեր Լաչինի միջանցքում Ադրբեջանի իշխանությունների և ենթադրյալ բնապահպան-ցուցարարների ձեռնարկած գործողություններով, որոնք հանգեցրել են Լեռնային Ղարաբաղը և Հայաստանը կապող, շրջանի հայ բնակչության համար կենսական նշանակություն ունեցող ճանապարհի փակմանը։
Ավելին, Ադրբեջանի վերահսկողության տակ գտնվող տարածքով անցնող՝ Լեռնային Ղարաբաղը գազով մատակարարող խողովակաշարի խափանման մասին տեղեկատվությունը խիստ մտահոգիչ է և էլ ավելի է մեծացնում հումանիտար լուրջ հետևանքների վտանգը:
Ինչպես գիտենք, Լաչինի միջանցքով անվտանգ տեղաշարժը երաշխավորվում է 2020 թվականի նոյեմբերի 9-ի եռակողմ հայտարարությամբ: Կոչ եմ անում Ադրբեջանի կառավարությանը կատարել այդ հայտարարությամբ ստանձնած իր պարտավորությունները և առավելագույն զսպվածություն ցուցաբերել ինչպես գործողությունների, այնպես էլ հռետորաբանության առումով։
Եվս մեկ անգամ ընդգծում եմ համապարփակ խաղաղության համաձայնագրի կնքման անհրաժեշտությունը, որը Լեռնային Ղարաբաղի հայ բնակչության իրավունքների և անվտանգության ամուր երաշխիքներ կապահովի։ Հորդորում եմ անհապաղ վերսկսել ԵՄ աջակցությամբ ամենաբարձր մակարդակով բանակցությունները և թուլացնել իրավիճակի լարվածությունը»։
