Մագնուս Կարլսենը դեռևս բացատրություն չի տալիս իր արարքների համար
Աջակցիր «Ա1+»-ինՇախմատի աշխարհի չեմպիոն Մագնուս Կարլսենն առաջին անգամ խոսել է Հանս Նիմանի շուրջ ստեղծված իրավիճակի մասին։
Հիշեցնենք, որ նորվեգացի շախմատիստը Սենթ Լուիսի Grand Chess Tour-ում ամերիկացի գրոսմասյտերին պարտվելուց հետո լքել էր մրցաշարը, իսկ այս օրերին ընթացող Սերունդների գավաթ խաղարկությունում նա երկու քայլից հետո հանձնվել էր Նիմանին։
«Դեռ ոչինչ չեմ կարող ասել այդ մասին, - Chess24-ին ասել է Մագնուս Կարլսենը, - Բայց մարդիկ կարող են ինքնուրույն եզրակացություններ անել: Ես պետք է ասեմ, որ շատ տպավորված եմ Նիմանի ելույթներով: Կարծում եմ, նրա մարզիչ Մաքսիմ Դլուգին շատ լավ աշխատանք է կատարել»։
Մագնուս Կարլսենը խոստացել է Սերունդների գավաթից հետո հայտարարություն անել ստեղծված իրավիճակի մասին։
«Հավանաբար հաջորդ շաբաթվա սկզբին ես կհայտնեմ իմ տեսակետը։ Հիմա ավելին ասեմ չեմ կարող: Պետք է կենտրոնանամ մրցաշարի վրա», - նշել է աշխարհի չեմպիոնը։
Մագնուս Կառլսենը Սերունդների գավաթի խաղարկության քառորդ եզրափակիչ փուլում կխաղա Լևոն Արոնյանի, իսկ Հանս Նիմանը՝ Լե Կուան Լիեմի հետ։ Նրանք իրար հետ կարող են հանդիպել միայն եզրափակիչում։