Բացել լրահոսը Փակել լրահոսը
A A
Քաղաքականություն Հասարակություն

Ընդդիմության հանրահավաքն Ազատության հրապարակում (տեսանյութ)

 Ազատության հրապարակում մեկնարկել է ընդդիմության նախաձեռնած հանրահավաքը, որի հիմնական պահանջը օրվա «իշխանության հեռացումն ու օր առաջ հայրենիքի ազատագրումն է»:
 
«Այս իշխանությունը պատրաստ է Արցախը թողնել Ադրբեջանի կազմում։ Այս իշխանությունը կատարում է թուրք-ադրբեջանական բոլոր պահանջները։ Պարտված ու անկարող գործող խմբակը միայն մեկ նպատակ ունի՝ երկարաձգել իր իշխանությունը։ Նրանք վտանգում են մեր պետականությունը, մեր ապագան, մեր կյանքը։ Ժողովրդի գլխին կախված նոր սպառնալիքները մտնելու են յուրաքանչյուր տուն, յուրաքանչյուր ընտանիք։ Այս ընթացքը պետք է կասեցնել»,-նման բովանդակությամբ հայտարարություն էր տարածել խորհրդարանական ըննդիմությունը՝ ՀՀ քաղաքացիներին կոչ անելով գալ «Ազատության» հրապարակ։
 
Ընդդիմադիր պատգամավոր Աննա Մկրտչյանը «Ա1+»-ի հետ զրույցում նշեց, որ այս հանրահավաքի միջոցով միջազգային հանրության ուշադրությունն են հրավիրում մեր երկրում տիրող իրավիճակի վրա: Ընդդիմադիր պատգամավորը իրենց հետագա քայլերի մասին ոչինչ չասեց, բայց վստահեցրեց, որ ամեն բան անելու են այս իշխանությանը հեռացնելու համար: ՀՀ քաղաքացիներից մի քանիսն էլ նշեցին, որ իրենք համաձայն չեն, որ իրենց փոխարեն որոշեն այս իշխանությունները:
 
ՀՀԿ փոխնախագահ Արմեն Աշոտյանն էլ կոչ արեց միանալ հանրահավաքին և իր խոսքերով ասած՝ քանի որ Հայաստանի կորստի առաջ ենք կանգնած, պետք է սկիզբ դնել հայաստանյան շարժման, որը Արցախին փրկվելու հույս կներշնչի:
 
Հանրահավաքին մասնակցում էր նաև ՀՀ երրորդ նախագահ Սերժ Սարգսյանը: Լրագրողների հարցերին ի պատասխան Սերժ Սարգսյանն ասաց, որ հրապարակն այն տեղը չէ,որ նման հարցեր քննարկեն: Վաղվա բանակցությունների առնչությամբ Սերժ Սարգսյանն ասաց, որ ինքը չի կարծում, թե վաղը որևէ փաստաթուղթ կստորագրի Նիկոլ Փաշինյանը և խնդրեց հրապարակը չվերածել ասուլիսի:
 
Սյունիքի խնդիրների մասին խոսեց «Հայաստան» խմբակցության պատգամավոր Վահե Հակոբյանը, «Պատիվ ունեմ» խմբակցությունից Տիգրան Աբրահամյանն էլ խոսեց վերջին օրերին Արցախում ստեղծված իրավիճակի մասին: «Հայաստան» խմբակցության պատգամավոր Արամ Վարդևանյանն էլ իր ելույթում նշեց, որ այսօր մեր երկրի իշխանությունը պատկանում է Ադրբեջանին ու Թուրքիային: Վարդևանյանը հույս հայտնեց, ու այս ապրիլն էլ բռունցքվելու, միաբանվելու, նոր էջ բացելու շրջան կլինի:
 
Մանրամասները՝ տեսանյութում: