ՀՅԴ Հայաստանի երիտասարդական միությունը և Հայաստանի Հանրապետական կուսակցության Երիտասարդական եւ ուսանողական կազմակերպությունները միասնական ակցիա են իրականացնում Արտաքին գործերի նախարարության շենքի դիմաց՝ ԱԳ նախարարին հիշեցնելով, որ ինքը չի ներկայացնում հայ ժողովրդի իրական շահերը։

Ըստ ակցայի մասնակիցների՝ Հայաստանի բոլոր իշխանությունները կողմ են եղել հարևաններիր հետ դիվանագիտական հարաբերությունների հաստատմանը,բայց այսօր խոսում են այն մասին, որ թուրք-ադրբեջանական տանդեմը մտնելու է մեր երկիր։

Բողոքի ակցիայի մասնակիցներից մեկն ասաց,որ նմանօրինակ ցանկացած դրսևորում, որը մղվում է երիտասարդների կողմից միանշանակ ողջունելի է, որովհետև այն կործանարար ճանապարհը,  որով գնում է այս իշխանությունը,  դրա ժառանգությունը կրելու են հենց երիտասարդները։

«Ավելի քան տեղին է երիտասարդների պայքարը ապագա իրենց ժառանգության, հայեցի ժառանգության համար։ Այսօր երիտասարդները հավաքվել են պայքարելու թշնամու հետ բարեկամական հարաբերություններ հաստատելու իշխանության դեմ»,- ասաց ակցիայի մասնակիցներից մեկը։

Նշենք ՀՀ ԱԳՆ-ի դիմաց ոստիկանական ուժերը պատ էին կազմել։ Ակցիայի մասնակիցներն իրենց ձեռքում պահել էին «Ոչ Արցախի հայաթափմանը» լոզունքներով պաստառներ։

ԱԺ «Պատիվ ունեմ» խմբակցության պատգամավոր Աննա Մկրտչյանը լրագրողների հետ զրույցում նշեց, որ օրվա  իշխանության շարունակականության գինը այսօր ՀՀ տարածք մխրճվող ադրբեջանական զորքերն են։

«Երբ ամեն անգամ ասում ենք՝ «գիտեք, Նիկոլ Փաշինյանը որևէ պատահական արտահայտություն չի անում, էդ պատգամավոր- ուսապարկերի կողմից չեն արվում»։ Դա հստակ ծրագիր է։ Հայաստանի ոչ մի Կառավարություն և Հայաստանի ոչ մի ղեկավար երբեք չի խոսել, չի բանակցել, չի քննարկել այն հանգամանքը, որ Արցախը կարող է լինել Ադրբեջանի կազմում»,- ասաց ընդդիմադիր պատգամավորը՝ նշելով՝

«Սրանք բացահայտ դա ասում են՝  «Եվ դուք կտեսնեք, ինչպես են սրանք հաջորդ քառօրյա նիստին կերակրելու այս նյութը, փորձելու, որ մենք մարսենք այս նյութը։ Հետո մի կես բերան կհերքեն»։

Ակցիայի մասնակիցները բարձրախոսով հայտարարեցին, որ Արարատ Միրզոյանը թույլ է տվել հակահայկական,հակապետական արտահայտություն, պնդելով՝ Հայաստանի բնակչությունը ցանկանում է կարգավորել հարաբերությունները Թուրքիայի հետ։

«Արարատ,պատուհանիցդ դուրս նայի։ Հայ ժողովուրդը դեմ է Թուրքիայի հետ հարաբերություններին։ Հայ ժողովուրդը չի պատրաստվում իրենց կոտորողի հետ մեկ սեղանի շուրջ նստել»,- հայտարարեց ակցիայի մասնակիցներից մեկը։

Ելույթ ունեցավ նաև ԱԺ «Պատիվ ունեմ խմբակցության պատգամավոր Տիգրան Աբրահամյանը՝ իրազեկելով հայրենակիցներին ստեղծված իրավիճակի մասին։

Պատգամավորը ներկայացրեց արդեն երկու շաբաթ շարունակվող Արցախում ստեղծված իրադրությունը՝ նշելով, որ մեր հայրենակիցները գտնվում են ադրբեջանական կրակահերթերի, հոգեբանական ճնշումների ներքո են։

Տիգրան Արբահամյանը հիշեցրեց ադրբեջանական կողմի բարձրախոսներով հնչեցվող սպառնալիքները, գազատարի խնդիրը՝ նշելով, որ Արցախում կա էներգետիկ ճգնաժամ։ Պատգամավորի խոսքով՝  Ադրբեջանի նպատակը հայաթափումն է։

Պատգամավորը նշեց,որ այսօր հավաքվել են ևս մեկ անգամ հաստատելու,որ Արցախը չի լինելու Ադրբեջանի կազմում և իրենք ամեն ինչ անելու են դա թույլ չտալու համար։

Ելույթ ունենցավ նաև ԱԺ «Հայաստան» խմբակցության պատգամավոր Ասպրամ Կրպեյանը ևս մեկ անգամ վերահաստատելով,որ Արցախը չի լինելու Ադրբեջանի կազմում։

Ակցիայի մասնակիցները ՀՀ ԱԳ նախարար Արարատ Միրզոյանի համար լողափնյա կիսատաբատ էին բերել, որպես նվեր, ինչպես նաև կարմիր գլխարկ և վարդագույն ակնոցներ։

Նախարարության շենքի մոտից երթով շարժվեցին կառավարության շենք՝ կառավարության ղեկավարին ևս մեկ անգամ հայտնելու, որ վերջինս հայ ժողովրդին նոր զիջումներ եւ կորուստների ոչ մի մանդատ չունի։

Մանրամասները՝ տեսանյութում։