Անկասելի Բենզեման ու «Ռեալի» ռևանշը «ՊՍԺ»-ի նկատմամբ

ՈՒԵՖԱ-ի չեմպիոնների լիգայում կայացան 1/8 եզրափակիչ փուլի պատասխան հերթական հանդիպումները: Մադրիդի «Ռեալը» սեփական դաշտում ընդունեց Փարիզի «ՊՍԺ»-ին, որին զիջել էր առաջին խաղում 0:1 հաշվով:

Հանդիպումը հաջող սկսվեց հյուրերի համար, որոնք 39-րդ րոպեին Կիլիան Մբապեի անհատական վարպետության շնորհիվ առաջ անցան հաշվի մեջ: Ֆրանսիացի հարձակվողը ընթացքում ևս երկու անգամ գրավեց մադրիդցիների դարպասը, սակայն մրցավարները երկու դեպքում էլ խաղից դուրս վիճակ արձանագրեցին:

Երկրորդ խաղակեսի 61-րդ րոպեին «Ռեալի» ֆրանսիացի հարձակվող Քարիմ Բենզեման օգտվելով ֆրանսիացիների դարպասապահի սխալից, հավասարեցրեց հաշիվը: Այնուհետև, 76-րդ և 78-րդ րոպեներին, նա ևս երկու գոլ խփեց և կտրուկ փոխեց խաղի ընթացքը:

Քառորդ եզրափակիչ մտնելու համար «ՊՍԺ»-ին հարկավոր էր գոնե մեկ գոլ խփել մնացած ժամանակում: Սակայն, հյուրերը միայն մեկ անգամ կարողացան լրջորեն սպառնալ, երբ Լիոնել Մեսիի տուգանային հարվածից հետո գնդակը թեթևակի դիպավ դարպասաձողին:

Այդպիսով, «Ռեալը» 3:1 հաշվով կամային հաղթանակ տարավ և երկու հանդիպումների արդյունքներով մտավ քառորդ եզրափակիչ, իսկ աստղային հարձակվողներ ունեցող «ՊՍԺ»-ն (Մբապե, Մեսի, Նեյմար) լիովին ձախողվեց պաշտպանությունում:

Զուգահեռ կայացած «Մանչեսթեր Սիթի» - «Սպորտինգ» խաղում անսպասելի գրանցվեց գոլազուրկ ոչ-ոքի` 0:0, այն դեպքում, որ առաջին խաղում անգլիացիները 5 անպատասխան գնդակ էին ուղարկել պորտուգալացիների դարպասը: Պայքարը կշարունակի «Մանչեսթեր Սիթին»: 

1/8 եզրափակիչ փուլի մնացած հանդիպումները տեղի կունենան մարտի 15-ին և 16-ին: