Բացել լրահոսը Փակել լրահոսը
photo (1)
A A
Հասարակություն

Զոհված կամ հաշմանդամության կարգ ստացած զինծառայողի ուսանող զավակի վարձը հնարավոր է լրիվ փոխհատուցվի

ՀՀ ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովը հոկտեմբերի 19-ի հերթական նիստում առաջին ընթերցմամբ քննարկել է Կառավարության հեղինակած  «Զինվորական ծառայության եւ զինծառայողի կարգավիճակի մասին» ՀՀ օրենքում լրացումներ կատարելու մասին» օրենքի նախագիծը: Այս մասին տեղեկացնում է ՀՀ ԱԺ մամուլի ծառայությունը։

ՀՀ ԿԳՄՍ փոխնախարար Կարեն Թռչունյանի տեղեկացմամբ՝ առաջարկվում է օրենքի 67-րդ հոդվածը լրացնել նոր մասով. «Պետությունը  Հայաստանի Հանրապետությունում  գործող հավատարմագրված ուսումնական հաստատությունների վճարովի համակարգի այն սովորողներին, որոնք ուսումնառության  ընթացքում ձեռք են բերել սույն հոդվածի  1-ին մասով նախատեսված կարգավիճակ, տրամադրում է  ուսանողական նպաստի ձեւով ուսման վճարի լրիվ փոխհատուցում՝ ՀՀ Կառավարության սահմանած կարգով»: Նշենք, որ գործող «Զինվորական ծառայության եւ զինծառայողի կարգավիճակի մասին» ՀՀ օրենքի 67-րդ հոդվածով սահմանված է, որ «Պետությունը երաշխավորում է ժամկետային պարտադիր զինվորական ծառայության ժամանակ ծառայողական պարտականությունները կատարելիս 1-ին կամ 2-րդ խմբի հաշմանդամության զինվորական կենսաթոշակի իրավունք ունեցող նախկին զինծառայողների, ինչպես նաեւ զոհված (մահացած) զինծառայողների ծնողների, ամուսնու (կնոջ) մինչեւ 27 տարեկան զավակների ընդունելությունը ՀՀ Կառավարության սահմանած ցանկում ընդգրկված Հայաստանի Հանրապետությունում հավատարմագրված ուսումնական հաստատություններ՝ ընդհանուր մրցույթից դուրս, առանձին մրցույթով, քննությունները դրական միավորներով հանձնելու դեպքում, ՀՀ պետական բյուջեի միջոցների հաշվին՝ ՀՀ Կառավարության սահմանած կարգով»:

Ընդունվելու դեպքում օրենքն ուժի մեջ կմտնի պաշտոնական հրապարակմանը հաջորդող տասներորդ օրը եւ տարածվելու է նաեւ մինչեւ սույն օրենքի ընդունումը ծագած իրավահարաբերությունների վրա:

Նախաձեռնությունը ստացել է հանձնաժողովի դրական եզրակացությունը, այն կընդգրկվի ԱԺ  նստաշրջանի օրակարգի նախագծում: