ՀՅԴ «Նիկոլ Աղբալյան» ուսանողական միության անդամները ակցիա էին իրականացնում Կառավարության շեքի դիմաց, սակայն այն երկար չտևեց, քանի որ մեկնարկից մի քանի րոպե անց ոստիկանները սկսեցին բերման ենթարկել մասնակիցներին։

Երբ հայտարարվել էր ակցիա իրականացնելու մասին, ՀՅԴ-ականները հայտնում են, որ իրենց հետ կապվել էին ոստիկանությունից ու զգուշացրել, որ ակցիայի ընթացքում բարձրախոս չօգտագործեն, ինչին ի պատասխան անդամները հայտարարություն էին տարածել, որ չեն կատարելու ոստիկանության կողմից ներկայացվող, իրենց կարծիքով, ապօրինի պահանջը։

Ակցիայի հենց սկզբում ՀՅԴ ՆԱՈՒՄ անդամ Տարոն Ղազարյանը  նշեց, որ հոկտեմբերի 4-ին Լիտվայի հայ համայնքի հետ կայացած հանդիպման ժամանակ վարչապետ Նիկոլ Փաշինյանը հարց էր բարձրացրել, թե 30 տարիների ընթացքում քանի՞ բնակելի շենք է կառուցվել Շուշիում և ինչու ոչ ոք հարց չի տալիս, թե ինչու չեն կառուցվել։

«Հերթական անհիմն և անպատասխանատու հայտարարություններն են։ Վարչապետի նպատակը հայոց բերդաքաղաքը թշնամուն նվիրելը, հանձնելն արդարացնելու համար վերջինս ուզում է Շուշիի մասով ստեղծել անարժեք քաղաքի տպավորություն։ Նա փորձում է անամոթաբար ներկայացնել, որ Շուշին հայության համար անարժեք քաղաք է եղել», - ասաց Տարոն Ղազարյանը։

Նա նշեց, որ Շուշիում այդ տարիների ընթացքում կառուցվել են բազմաթիվ թանգարաններ, հյուրանոցներ, բազմաբնակարան շենքեր։ Նա դեռ չէր հասցրել խոսքը ավարտել, երբ ոստիկանների մեծ խումբ մոտեցավ նրան ու բերման ենթարկեց։ Նա բարձրախոսով էր խոսում, ինչն էլ ավելի վաղ արգելել էին ոստիկանները։

Մի քանի րոպեանոց քաշքշուքից հետո ՀՅԴ երիտասարդներից մեկը նշեց, որ ՀՀ-ում առաջին անգամ բարձրախոսով խոսելու համար բերման ենթարկեցին․ «Ոստիկաններն ինչ-որ օրենքի կետ են մեջբերում, որ դրանով աշխատանքային ժամին խաթարվում է Կառավարության գործունեությունը։ Այս իշխանություններն ամեն ինչի ընդունակ են։ Այսօր մենք եկել էինք ՀՀ թիվ մեկ հողատուին ասելու, որ Շուշիում 30 տարիների ընթացքում բազմաթիվ գործեր են արվել և եթե նա ներկայացնում է, որ այնտեղ ոչինչ չի արվել, սուտ է։ Չէինք եկել հայհոյելու ու վատ բաներ ասելու»։

Երիտասարդին նույնպես բերման ենթարկեցին և հետո նրա ընկերները նշեցին, որ բերման են ենթարկել նրա ասած «կապիտուլյանտ և հողատու» բառերի և լրագրողներին հարցազրույց տալու համար։

Ակցիայի մասնակիցների մեջ էր նաև «Հայաստան» դաշինքի պատգամավոր Քրիստինե Վարդանյանը, վերջինս էլ նշեց, որ այստեղ էր եկել նրա համար, որ ոստիկանությունը զգուշացրել էր՝ «ռուպռ» օգտագործելու համար բերման են ենթարկելու․ «Նման օրենք և կարգավորում չկա ՀՀ որևէ օրենսգրքով։ Մի քանի մարդու արդեն բերման են ենթարկել։ Եթե իմ ընկերներին բերման են ենթարկում «հողատու և դավաճան» ասելու համար, ես կրկնում եմ այդ բառերը։ Ես հենց հիմա կրկնեցի այն ամենը, ինչ արեցին իմ ընկերները, ինչի՞ ինձ բերման չեն ենթարկում»։