«Մեզ հասած ժառանգությունն ու այսօրվա մեր տեղն աշխարհի գիտամշակութային քարտեզի վրա համապատասխան չեն» (տեսանյութ)
Աջակցիր «Ա1+»-ին«Մատենադարան» Մեսրոպ Մաշտոցի անվան հին ձեռագրերի գիտահետազոտական ինստիտուտում կայացավ «Ախթամարի Սուրբ Խաչ եկեղեցի» գրքի շնորհանդեսը։
Գիրքը հրապարակվել է 2019-ին, սակայն համավարակը խանգարեց շնորհանդես կազմակերպել։ Բայց, նկատի ունենալով գրքի նշանակությունը «Մատենադարան» հին ձեռագրերի գիտահետազոտական ինստիտուտ» հիմնադրամի տնօրեն Վահան Տեր-Ղևոնդյանի խոսքով, որոշեցին գոնե այս տարի իրականացնել շնորհանդեսը։
Գիրքը տպագրվել է «Բրիլ» հրատարակչությունում, որն ունի հայագիտական ուսումնասիրությունների մատենաշար։ Գրքում ներառված են 2014 թվականում Փարիզում Ախթամարի Սուրբ Խաչ եկեղեցու կառուցման 1100-ամյակին նվիրված միջազգային գիտաժողովի նյութերը։
«Եթե մեր պատմական ուղին և թողած ժառանգությունը համեմատելու լինենք, թե ինչ տեղ ու դիրք ունենք աշխարհի գիտամշակութային քարտեզի վրա, ապա այդ երկուսը իրար չեն համապատասխանում։ Եվ մենք պետք է շատ ջանք թափենք, որպեսզի իր պատշաճ տեղը գտնի հայ, մասնավորապես միջնադարյան մշակույթը»,- ասաց պարոն Տեր-Ղևոնդյանը և ընդգծեց, որ Բրիլի մեկ հրատարակված գիրքը նույնքան արձագանք է ունենում, որքան մեր հրատարակչությունների կողմից տպագրված 30-40 գրքերը միասին, քանի որ դա այլ մակարդակ է, թե ակադեմիական շրջանակներում ընդունելության առումով, թե տարածման առումով։
