Հայաստանը հաղթեց Սլովակիային` 3:1
Այսօր Վազգեն Սարգսյանի անվան «Հանրապետական» մարզադաշտում Հայաստանի հավաքականը հյուրընկալել էր Սլովակիայի հավաքականին:
Խաղն ավարտվեց 3:1` հօգուտ Հայաստանի: Սլովակիայի դարպասը գրավեցին Յուրա Մովսիսյանը, Գեւորգ Ղազարյանը, Հենրիխ Մխիթարյանը: Իսկ հյուրերից գոլ խփեց Ռադոսլավ Զաբավնիկը:
Ի դեպ, «Եվրո-2012» -ի ընտրական 2-րդ խմբում սլովակները միակն են, որ մասնակցել են աշխարհի առաջնությանը:
Խաղը դիտում էր նաեւ ՀՀ նախագահ Սերժ Սարգսյանը: Ֆուտբոլային հանդիպման սկզբում անձրեւում էր:
«Հանրապետական» մարզադաշտին հարակից փողոցներում խաղից հետո լսվում էին երկրպագուների` Հայաստան, Հայաստան վանկարկումները:
Վլադիմիր Վայսը ընդունեց պարտությունը
Իսկ Վարդան Մինասյանը շնորհակալություն հայտնեց երկրպագուներին:
«Շնորհավորում եմ դաշտի տերերին հաղթանակի կապակցությամբ: Նրանք այսօր շատ լավ խաղացին: Մենք նույնպես պահեր ունեցանք, բայց կարողացանք միայն մեկը օգտագործել: Ցավոք, մեր 7-8 խաղացողները այսօր իրենց մակարդակից ցածր խաղացին: Այնուամենայնիվ, երբ թիմը պարտվում է, ապա մեղավորը մարզիչն է: Ես ընդունում եմ իմ մեղքն այս պարտության համար», - այսօր Երեւանում կայացած Հայաստան - Սլովակիա ֆուտբոլային խաղից հետո ասաց հյուրերի գլխավոր մարզիչ Վլադիմիր Վայսը:
Մեր ընտրանու գլխավոր մարզիչ Վարդան Մինասյանը նախեւառաջ շնորհակալություն հայտնեց երկրպագուներին` անմնացորդ եւ բուռն աջակցության համար: «Այսօրվա արդունքը լրիվ համապատասխանում է խաղի ընթացքին: Այս հաղթանակը հոգեբանական վստահություն հաղորդեց տղաներին: Հանդիպումը ցույց տվեց, որ մեր խաղացողները նույնպես ֆուտբոլ խաղալ գիտեն, պարզապես նրանք պետք է ավելի շատ մտածված գործեն խաղադաշտում»:
Խոսելով հաջորդ, Անդորայի հավաքականի հետ հանդիպման մասին, Վարդան Մինասյանն ասաց, որ այն նույնպես դժվար խաղ կլինի, քան որ անդորացիները վերջին տարիներին ավելի ագրեսիվ են խաղում, քան նախկինում:
