Մեծամասշտաբ պատերազմը Հայաստանի և Ադրբեջանի միջև թեև ավարտվել է նոյեմբերին, սակայն առավել ցածր ինտենսիվությամբ կոնֆլիկտը շարունակվում է։ Այս մասին ասուլիսում ասաց «Կովկասի ինստիտուտի» տնօրեն, քաղաքագետ Ալեքսանդր Իսկանդարյանն ու հավելեց, որ Ադրբեջանի նախագահ Իլհամ Ալիևը, հաղթելով մեծամասշտաբ պատերազմում, փորձում է հնարավոր ամեն ինչ վերցնել այդ հաղթանակից։

Այդ ամենը, նրա խոսքով, հասկանալի է ոչ միայն նրա հայտարարությունների միջոցով։ Պետք է ուշադրություն դարձնել նաև նրա գործողություններին։   

«Գերիներին Ալիևը նույնպես օգտագործում է Հայաստանին ճնշելու համար։ Հայաստանյան ներքին քաղաքական կյանքում Ալիևն այսօր կարևոր խաղացող է, նա արդեն Հայաստանի ներսում փոխել է քննարկման թեմաները։ Փաստացի, մենք արդեն Արցախի մասին չենք խոսում և պաշտպանում ենք ոչ թե Արցախը, այլ Սյունիքը», - ասաց Իսկանդարյանը։

Այս պահին ադրբեջանցիները ցանկանում են, նշեց նա, որ Հայաստանի հարավով անցնի երկաթգիծ, որի անվտանգությունը կպահեն ոչ հայ զինված ուժերը։ Թեև Հայաստանում այժմ այդ երևույթին այլ անունով են կոչում և նշում են՝ ճանապարհները բացել, սակայն վստահաբար կարելի է նշել, որ Ադրբեջանն այնքան էլ շահագրգռված չէ Հայաստանի էկոնոմիկայի զարգացմամբ՝ ճանապարհները բացելու հետևանքով։

«Եթե տարածաշրջանում բոլոր ճանապարհները բաց լինեն, իմ կարծիքով, դա սարսափելի վատ է։ Այսինքն, ես կարող եմ նստել իմ մեքենան ու Ադրբեջանով գնալ դեպի Ստավրոպոլ, բայց ո՞վ է ապահովելու իմ անվտանգությունը։ Եթե ենթադրենք, որ բացվում է միայն երկաթուղին։ Այդ գնացքներով, օրինակ, ծիրան է գնալու Մոսկվա, ո՞վ է հսկելու այդ գնացքները, ի՞նչ եղանակով», - ասաց Ալեքսանդր Իսկանդարյանը։

Այժմ այն, ինչ անում է Ադրբեջանը, նրա խոսքով, դելիմիտացիա և դեմարկացիա չէ։ Դրանց պարագայում երկրները նստում են ընդհանուր սեղանի շուրջ ու որոշում են՝ սահմանի որ հատվածն ում տարածքում է մնալու․ «Նման բան տեղի չի ունենում։ Զինված մարդիկ մտնում են, պոկում են Հայաստանից մի կտոր, կանգնում են այնտեղ ու ասում են՝ դուրս չենք գալու։ Իսկ Հայաստանի համար տարբերակ չկա բանակցություններում իր դիրքորոշումն ու հետաքրքրությունները ցույց տալու համար»։