«Հարկայինը խեղդում է, չեն թողնում աշխատենք»․ սիրիահայ (տեսանյութ)
Աջակցիր «Ա1+»-ինՀալեպահայ Վահրամ Տեր-Օհանյանը Երևան է տեղափոխվել Սիրիայի պատերազմից հետո։
Ասում է՝ մինչև կորոնավիրուսը գործերը լավ էին այստեղ։ Կորոնավիրուսից հետո, երբ վերսկսեցին աշխատանքը, սկսվեց պատերազմը։ Հազիվ է տեղավորվում իր ստացած եկամտի մեջ, քանի որ բնակվում է վարձով, իսկ կրպակի վարձակալության համար վճարում է ամսական 500 դոլարին համարժեք դրամ։ Վաճառում է բուրգերներ, սենդվիչներ, արևելյան՝ արագ պատրաստվող ուտեստներ՝ 350-800 դրամով ։ Գներն է նույնիսկ իջեցրել, բայց այցելու չկա։
Ակնկալել է, որ կառավարությունը ձեռք կմեկնի, բայց քայլերը չի տեսնում։
«Վարձակալությունը նույնը մնաց, 1 դրամ չեն իջեցրել, բայց ամեն ինչ թանկացել է։ Հարկերը նույնն են, սակայն հարկայիննն է խստացել՝ խեղդում են, չեն թողնում աշխատենք, ասում են՝ վաճառք ես ունենում, սակայն ՀԴՄ կտրոն չես խփում, մինչդեռ պատերազմից հետո հաճախորդների թիվը կտրուկ նվազել է»,-ասում է նա ։
Բիզնեսում ունեցած դժվարությունները և հետպատերազմյան իրավիճակն ազդել են Վահրամի՝ Հայրենիքում ապրելու մեծ ցանկության վրա։ Նա որոշել է մեկնել Հայաստանից ցանկացած այլ երկիր՝ բացի Թուրքիայից և Ռուսաստանից։
«Հալեպի շուկայում» աշխատող Հարութը, արդեն 20 տարի է՝ Հալեպից վերադարձել է Հայաստան։
Մասնագիտությամբ դերասան է, սակայն այժմ զբաղվում գրաֆիկ և վեբ դիզայնով, է հեռախոսների վերանորոգմամբ, ինչպես նաև՝ աքսեսուարների վաճառքով։
Ասում է՝ դերասաններին Հայաստանում վարձատրում են բավականին ցածր, և նույնիսկ ամեն օր նկարահանվելու դեպքում այդ գումարով չի կարող ապրել։ Մինչև պատերազմն իր գործերը լավ էին ։ «Պատերազմն ու կորոնան համը հանեցին»,-ասում է նա
Հարութի սիրիահայ ընկերներից շատերն արդեն այստեղ չեն, հիմնականում հաստատվել են Կանադայում և Ավստրալիայում։ Իր շրջապատի մեծ մասը տեղացի հայեր են, քանի որ արդեն երկու տասնամյակ է՝ բնակվում է այստեղ, սակայն սիրիահայերի հետ երբեմն հավաքվում են՝ տարաբնույթ առիթներով։
Հարութը մնում է այստեղ, Հայաստանից որևէ այլ տեղ մեկնելու մտադրություն չունի՝ անկախ այսօրվա իրականությունից և ստեղծված իրավիճակից։
