Մայիսի 27-ին Մարդու իրավունքների պաշտպան Գեղամ Ստեփանյանը Արցախի Հանրապետության Ազգային ժողովի հերթական նիստում ներկայացրել է Մարդու իրավունքների պաշտպանի 2020թ. գործունեության, ինչպես նաև մարդու իրավունքների և ազատությունների պաշտպանության վիճակի մասին տարեկան հաղորդումը:

 

Պաշտպանը նշել է, որ հաշվետու տարում ՄԻՊ աշխատակազմը 481 անձանցից ստացել է 377 դիմումներ, որոնք հիմնականում վերաբերում էին սոցիալական ապահովության, առողջության պահպանման, պատշաճ վարչարարության, արդար դատաքննության, աշխատանքային և մի շարք այլ իրավունքների և ազատությունների։

 

Գեղամ Ստեփանյանը ըստ ոլորտների անդրադարձել է արձանագրված խնդիրներին` ամփոփ ներկայացնելով դրանց լուծման ուղղությամբ Մարդու իրավունքների պաշտպանի առաջարկները։

 

Իր ելույթում Պաշտպանը ներկայացրել է նաև 2020 թ-ի սեպտեմբերին Ադրբեջանի կողմից Արցախի դեմ իրականացված ագրեսիայի ընթացքում Մարդու իրավունքների պաշտպանի կողմից նախաձեռնված փաստահավաք առաքելության արդյունքները, ինչպես նաև միջազգային կազմակերպությունների հետ Արցախի ժողովրդի իրավունքների պաշտպանության բնագավառում ձևավորված համագործակցությունը։