Արմատական բարեփոխում` հանրային ծառայությունների մատուցման ոլորտում․ որոշ ծառայությունների համար պետտուրքերը հանվել են, որոշների ժամկետներն են կրճատվել

                  Հանրային ծառայությունների մատուցման ոլորտում Կառավարությունը արմատական բարեփոխում է իրականացրել, որի արդյունքում կթվայնացվեն Արդարադատության նախարարության կողմից մատուցվող հանրային ծառայությունները, կպարզեցվի վարչարարությունը, կկրճատվեն ժամկետները, կնվազեցվեն  կոռուպցիոն ռիսկերը։

                  Մայիսի 16-ից ուժի մեջ մտած օրենսդրական փոփոխությունների արդյունքում այսուհետ․

• Քաղաքացիական կացության ակտերի գրանցման պետտուրքի վճարումից ընդհանրապես ազատվում են՝

1. Կենսաթոշակառուները,
2. 1-ին և 2-րդ խմբի հաշմանդամները և հաշմանդամ երեխաները,
3. Ընտանիքների անապահովության գնահատման համակարգում հաշվառված անձինք,
4. Ռազմական գործողությունների մասնակիցները, ռազմական գործողությունների հետևանքով զոհված, հաշմանդամ դարձած, անհայտ բացակայող կամ մահացած ճանաչված անձի ամուսինը, զավակը և ծնողը։

Այլ բարեփոխումներ՝

• Ամուսնության գրանցման, ՔԿԱԳ տեղեկանքներ տրամադրելու և առցանց եղանակով անհատ ձեռնարկատեր հաշվառվելու համար այլևս պետական տուրք չի պահանջվի։
• Կկրճատվի ամուսնության բացակայության մասին տեղեկանքի տրամադրման համար ժամկետը 7 աշխատանքային օրից, իսկ բնակչության պետական ռեգիստրում հաշվառում չունեցող անձանց համար 10 աշխատանքային օրից՝ տեղում:
• Փաստաթղթերն ապոստիլով կվավերացվեն ներկայիս 2 կամ 3 օրվա փոխարեն՝ 1 օրում:
• Կկրճատվեն անվան փոխման գրանցման ժամկետները․ մինչև 5 ամսից կդառնա 15 աշխատանքային օր։
• Կկրճատվի ուղղում, փոփոխություն և լրացում կատարելու, ինչպես նաև ակտի վերականգնում կատարելու համար մինչև 4 ամիս տևող ժամկետը՝ դառնալով 15 աշխատանքային օր:
• Ուղղագրական սխալների փոփոխման համար սահմանված ժամկետը կկրճատվի մինչև 3 աշխատանքային օր։
• Առևտրային կազմակերպությունների գրանցման ժամկետը կկրճատվի ու կսահմանվի 1 աշխատանքային օր։
• Լիազորված անձի միջոցով անհատ ձեռնարկատեր հաշվառվելու հնարավորություն կընձեռնվի:
• Առաջին անգամ հնարավորություն կտրվի ՀՀ տարածքից դուրս հյուպատոսական հիմնարկների կողմից ընդունել ինչպես ՀՀ քաղաքացիների, այնպես էլ օտարերկրյա քաղաքացիների դիմումներ՝ Հայաստանում բիզնես հիմնադրելու կամ հայկական ընկերության մասնաբաժին գնելու համար։

 ՀՀ ԱՆ տեղեկատվության և հասարակայնության

 հետ կապերի վարչություն