Քաշաթաղում տունը կորցրած 7 ընտանիք վերադարձել է Արցախ հունվարի սկզբին (տեսանյութ)
Աջակցիր «Ա1+»-ինՇուրջ 50 ընտանիք՝ հիմնականում Քաշաթաղի շրջանից, դիմել են Արցախի Հանրապետության օպերատիվ շտաբ՝ Արցախ վերադառնալու ու մյուս գյուղերում բնակություն հաստատելու համար։
«Հունվարի այս առաջին օրերին թվով 7 ընտանիքներ կոնկրետ Քաշաթաղի շրջանից վերադարձել են ու բնակչություն հաստատել Ասկերանի շրջանի Բադարա գյուղում, մյուսները սպասում են շինարարական աշխատանքների ավարտին »,-ասում է շտաբի աշխատանքները համակարգող Միքայել Վիրաբյանը։
Նրա խոսքով՝ ընտանիքներին տրամադրվել է համապատասխան գույք։
Օպերատիվ շտաբի կողմից այս պահին տարվում են կարիքների գնահատման աշխատանքներ ՀՀ-ում մնացած արցախցիների վերաբերյալ։
«Ոչ մի տարբերություն մեզ համար չկա ԱՀ բնակչների մեջ, մեզ համար յուրաքանչյուրն ունի հավասար իրավունքներ ու բոլորն էլ նույն ձև են օգտվում ծրագրերից»,-նշում է Վիրաբյանը։
ԱՀ-ի կողմից շտաբին տրամադրած ֆինանսական միջոցները՝ մոտ 200 մլն դրամ, հիմնականում ուղղվել է թշնամու կողմից բռնազավթված տարածքների բնակիչներին, ովքեր գտնվում են ՀՀ տարբեր մարզերում․ «Այդ գումարներից շուրջ 54 մլն դրամ ուղղվել է զոհված զինծառայողների թաղման արարողությունների մասնակի կազմակերպման համար»,-ասում է նա։
Վիրաբյանը տեղեկացնում է, որ Երևանից Արցախ անվճար ավտոբուսները կշարունակեն աշխատել այնքան ժամանակ, ինչքան դրանց անհրաժեշտությունը կա։
Արցախի կառավարության օպերատիվ շտաբն աշխատում է հոկտեմբեր ամսվա վերջից։ Աշխատանքի գնահատականը, Միքայել Վիրաբյանի խոսքով, պետք է տա բնակչությունը։