Ընդդիմադիր կուսակցություններն այսօր կարճ հավաք են անցկացրել Ֆրանսիայի հրապարակում: Հավաքը սկսվել է Միքայել եպիսկոպոս Աջապահյանի աղոթքով: Այնուհետև ելույթներ են ունեցել ՀՅԴ ԳՄ ներկայացուցիչ Իշխան Սաղաթելյանը, ԲՀԿ առաջնորդ Գագիկ Ծառուկյանը, «Հայրենիքի փրկության շարժում» կուսակցությունների խմբի վարչապետի թեկնածու Վազգեն Մանուկյանը: Վերջինս խոսել է ժողովրդի երազանքների ու պատերազմի մասին:

Մանուկյանը ասել է, որ պատերազմը կարող էր և չլինել, եթե բանակցությունները չտապալվեին: Իսկ երբ արդեն պատերազմը սկսված էր, ըստ Մանուկյանի, հնարավոր էր հաղթել և  եթե անգամ երկիրը պատրաստ չէր պատերազմի, պետք էր շուտ կնքել պայմանագիրը և վերջ տալ պատերազմին:

Ելույթներից հետո ընդդիմադիր ուժերի ներկայացուցիչներն ու նրանց աջակիցները սկսել են երթը: Այն ուղեկցել են ոստիկանները: Երթի մասնակիցները՝ վանկարկումներով ու վարչապետի հրաժարականի կոչերով անցել են Մաշտոցի պողոտայով, Հանրապետության հրապարակով և հասել  Սուրբ Գրիգոր Լուսավորիչ եկեղեցի, որտեղ մատուցվել է հոգեհանգստի կարգ՝ ի հիշատակ Արցախյան պատերազմում նահատակված հերոսների: