Հանրապետության հրապարակից վարչապետ Նիկոլ Փաշինյանի գլխավորությամբ այսօր մեկնարկեց հիշատակի սգո երթ դեպի «Եռաբլուր» զինվորական պանթեոն։

 

Երթին մասնակցում էին նաև Ազգային ժողովի նախագահ Արարատ Միրզոյանը, Անվտանգության խորհրդի քարտուղար Արմեն Գրիգորյանը և բարձրաստիճան այլ պաշտոնյաներ։

 

Կառավարության շենքից Նիկոլ Փաշինյանի դուրս գալուն պես հնչեցին ծափեր և , «Նիկոլ, Նիկոլ», «Նիկոլ, վարչապետ», «Դուխով» վանկարկումներ: Վարչապետն ու պաշտոնյանները հորդորեցին դադարեցնել վանկարկումներն ու ծափերը։ 

 

Մեկ ժամի չափ տևեց երթը, որն անցավ հիմնականում լուռ, բայց լարվածություն այնուամենայնիվ  զգացվում էր։

 

Հասնելով Եռաբլուր իրավիճակը սրվեց։ Նրանք, ովքեր սպասում էին Նիկոլ Փաշինյանի հայտնվելուն, սկսեցին վանկարկել՝ «Նիկո՛լ, դավաճան», իսկ երթի մասնակիցները՝ «Նիկո՛լ, վարչապետ»։

 

Նիկոլ Փաշինյանը արձագանքեց վանկարկումներին. «Չեղավ, չեղավ ժողովուրդ, էսօր սգում ենք, սգո երթ ա»:

 

Մեծաթիվ անվտանգության աշխատակիցներ և ոստիկանական ուժերի օգնությամբ Նիկոլ Փաշինյանին ու իշխանության մյուս ներկայացուցիչներին հաջողվեց ճեղքել Եռաբլուրի մուտքը փակած ազատամարտիկների և մյուս քաղաքացինեի պատը և հասնել անմահացած հերոսների շիրիմներին։

 

Վարչապետը խոնարհվեց և ծաղիկներ խոնարհեց նրանց շիրիմնեի առաջ, զրուցեց հարազատների հետ և մխիթարեց նրանց։ Վարչապետի և իշխանության մյուս ներկայացուցիչների հեռանալուց հետո լարվածությունը Եռաբլուրում տևական ժամանակ պահպանվեց։

 

Հիշեցնենք՝ Հայաստանում և Արցախում հայտարարված է եռօրյա սուգ։