Հայաստանում կորոնավիրուսի դեմ պատվաստվել է միայն Արսեն Թորոսյանը
Աջակցիր «Ա1+»-ինԱրդեն մի քանի օր է, ինչ պոլիկլինիկաներում վերսկսվել են առողջ բնակչության պատվաստումները՝ սեզոնային գրիպի դեմ։
Հիվանդությունների վերահսկման և կանխարգելման ազգային կենտրոնի գլխավոր տնօրենի տեղակալ Գայանե Սահակյանի խոսքով՝ երբ կորոնավիրուսային հիվանդության թվերը սկսել էին աճել՝ հասնելով մինչև 2000-ի, բնակչության մասնակցությունը մի պահ դանդաղել էր։
«Սկզբում մարդիկ վախենում էին, մտածում էին, որ եթե գան պատվաստման, պոլիկլինիկաներում կվարակվեն, բայց հիմա, երբ թվերն արդեն նվազում է, մարդիկ ակտիվ մասնակցում են պատվաստումներին»,- «Ա1+»-ի հետ զրույցում նշում է նա։
Հիշեցնենք, որ հոկտեմբեր ամսից սկսվել էին ռիսկի խմբերի պատվաստումները։ Ինչ վերաբերվում է կորանավիրուսի դեմ պատվաստանյութին, ապա առայժմ մեկ հոգի է պատվաստվել՝ ի դեմս Առողջապահության նախարարի։
Գայանե Սահակյանի խոսքով՝ պատվաստանյութը որևէ հետևանք չի թողել և նախարարը շուտով պատվաստանյութի երկրորդ չափաբաժինը կստանա։
Նոյեմբեր ամսին ՌԴ-ի Առողջապահության նախարարության կողմից ՀՀ-ն Կորոնավիրուսի դեմ պատվաստանյութի որոշակի խմբաքանակ էր նվեր ստացել։ Այն առայժմ օգտագործվելու է կլինիկական փորձարկման ձևով՝ ինչպես ՌԴ-ում։
«Այս պահին կան կամավոր գրանցվողներ, ովքեր սպասում են իրենց հերթին՝ պատվաստվելու համար, որոշակի գործընթացների ավարտից հետո նրանք հերթով կպատվաստվեն»,- ասում է նա։