Բացել լրահոսը Փակել լրահոսը
A A

Մեքենան ընկել է կամրջից (տեսանյութ)

Մարզեր

Շիրակի մարզի Առափիի կամրջի վրայից շուռ է եկել ՙՄոսկվիչ՚ մակնիշի մեքենա: Մեքենայի մեջ վարորդից բացի եղել է նաեւ վեցամյա տղա երեխա: Մեքենայից նրանց հանել է գյուղի բնակիչներից մեկը:

Ականատեսների վկայությամբ մեքենան սլացել է բավական արագ՝ երեւի չնկատելով կամրջի փլուզված հատվածն ու շուռ եկել: Հիշեցնենք, որ կամրջի գրունտային հատվածը փլուզվել էր դեռեւս մարտի 16-ին՝ Ախուրյան գետի վարարման պատճառով: 

Առափեցիները հավաստում էին, որ վթարի ենթարկվածները բավականին վախեցած են եղել:

Նրանք հեռացել են համապատասխան օգնություն ստանալուց հետո: Առափցիների կարծիքով` մեքենան ընթացել է բավականին արագ, քանի որ կարողացել է անցնել փլուզված մասի առջեւ շարված քարերի միջով:

Թե մեքենան ում է պատկանում եւ ով է եղել ղեկին նստած երիտասարդը՝ գյուղացիները չգիտեն, միայն նշեցին, որ մեքենան ունեցել է 45 ՍՕ 538 պետհամարանիշը, եւ վարորդը եղել է Գյումրիից: Դեպքի հետեւանքով վերջինս կորցրել է խոսելու ունակությունը, ինչի պատճառով գյուղացիները ոչ մի մանրամասն չեն իմացել:

Կամրջի փլուզված հատվածում գյուղացիներն իրենց գլխի ճարը տեսել են իրենց ձեւով. փլուզված հատվածը քարերով են փակել եւ իրենց համար աստիճաններ տեղադրելով գետի մյուս ափ անցնելու համար ճանապարհ ստեղծել:

Սակայն անվտանգությունն ապահովելու համար նախատեսված որեւէ ճանապարհային նշան չէին փակցրել, երեւի դա էլ թողնելով համապատասխան մարմիններին:

Գյուղապետ Ալբերտ Այվազյանի հավաստմամբ, իրենք պատրաստվում են կամուրջը վերանորոգել սեփական միջոցներով, արդեն հատկացրել են գումարներ եւ սպասում են բարենպաստ եղանակի:

Նշենք, որ մեր նկարահանման պահին դեպքի վայրում միայն գյուղացիներն էին, չկային ոչ արտակարգ իրավիճակների վարչության եւ ոչ էլ ճանապարհային ոստիկանության ներկայացուցիչները:

Գյումրիի "Ցայգ" ՀԸ