«Արարատը» հաղթեց «Ուրարտուին» և միացավ մեդալների համար պայքարին
Աջակցիր «Ա1+»-ինՖուտբոլի Հայաստանի բարձրագույն խմբի 18-րդ տուրի վերջին խաղում Երևանի «Արարատը» սեփական դաշտում 1:0 հաշվով հաղթեց «Ուրարտուին»: Միակ գոլը 54-րդ րոպեին խփեց տանտերերի վրացի լեգեոնական Դավիդ Խուրցիձեն:
Այս հաղթանակից հետո «Արարատը» վաստակեց 31 միավոր և հավասարվեց 3-րդ հորիզոնականում գտնվող «Ալաշկերտին»: «Ուրարտուն» նորանշանակ գլխավոր մարզիչ Ալեքսանդր Գրիգորյանի ղեկավարությամբ կրեց իր առաջին պարտությունը և բաց թողեց առաջին գնդակն առաջնությունում:
Այդպիսով, «Արարատ» - «Ուրարտու» հանդիպումով ավարտվեց ֆուտբոլի Հայաստանի բարձրագույն խմբի առաջին փուլը: Առաջին վեց տեղերը գրաված թիմերը երկու շրջանով մրցաշարում կորոշեն չեմպիոնին ու մրցանակակիրներին, իսկ ահա երեք անհաջողակները կվիճարկեն 7-9-րդ տեղերը: Հիշեցնենք, որ Երևանի համանուն թիմը, որը ոչ մի միավոր չի վաստակել, այս տարվանից դուրս է եկել առաջնությունից:
Մրցաշարային աղյուսակ
Առաջին փուլ
- «Արարատ-Արմենիա»՝ 36 միավոր
- «Լոռի ՖԱ»՝ 32
- «Ալաշկերտ»՝ 31
- «Արարատ»՝ 31
- «Նոա»՝ 30
- «Շիրակ»՝ 28
- «Փյունիկ»՝ 23
- «Ուրարտու»՝ 23
- «Գանձասար-Կապան»՝ 18