«Այո, պետք է գնալ մինչև վերջ». վարչապետը՝ Մարտի 1-ի գործի մասին (տեսանյութ)
Աջակցիր «Ա1+»-ինՇատ մանրամասներով բացահայտված է, թե ինչ է տեղի ունեցել մարտի 1-ին և դրանից հետո: Այս մասին այսօր հրավիրված ասուլիսում հայտարարեց ՀՀ վարչապետ Նիկոլ Փաշինյանը:
«Ըստ մեղադրանքի, եթե գործը քննող քննչական խմբի ղեկավարը տարածքում կրակված պարկուճները փոխել է, հասկանու՞մ եք՝ ինչ է նշանակում դա. նշանակում է իսկական կրակված պարկուճները չկան, և մենք հնարավորություն չունենք այսօր պարկուճների միջոցով նույնականացնել ու զենքերը գտնել: Հիմա այդ քննչական խմբի ղեկավարը հետախուզման մեջ է, ինչո՞ւ, թող գա պատմի՝ ինչ է արել այդ պարկուճները: Գուցե ինքը գիտի սպանության հեղինակների անուն, ազգանունները»,-ասաց Փաշինյանը:
Փաշինյանը պնդում է՝ մեծ հաշվով պարզ է, թե ովքեր և ինչ շրջանակ է կազմակերպել Մարտի 1-ի սպանությունները։
«Այո, պետք է գնալ մինչև վերջ ու բացահայտել այն անհատներին, ովքեր կրակոցներն իրականացրել են, բայց պարզ է՝ ովքեր են ապօրինի զինված խմբավորումներ ձևավորել ու մտցրել ժողովրդի մեջ: Այսօր քրեական գործերը հարուցված են, մի մասն ուղարկված է դատարան»:
Հենց քննչական խմբի ղեկավարի կողմից ամենակարևոր ապացույցները կեղծված են,-պնդում է Փաշինյանը և հավելում, թե պետք կռահել, որ նա դա իր նախաձեռնությամբ չի արել:
«Երբ այն ժամանակ գործող նախագահի օգնականը փաստահավաք խմբի քննության գնացող մարդկանց նկատմամբ ճնշումներ էր գործադրում, ինչի՞ համար էր դա արել՝ իրականությունը թաքցնելու համար: 10 տարի թաքցված իրականությունը շատ հեշտ չէ 2 տարում բացահայտել»:
Վարչապետը չբացառեց, որ հնարավոր է ապացույցներն իսպառ ոչնացված լինեն.
«Եթե իրական պարկուճները տարել, ձուլարանում մի տեղ ձուլել են, պատկերացնո՞ւմ եք՝ դա ինչ է նշանակում»,-եզրափակեց նա: