«Ֆինանսական բուրգի» գործով տուժողի կարգավիճակ ունի 10 անձ, հարցաքննվել է շուրջ 7 տասնյակ վկա
Աջակցիր «Ա1+»-ինՖինանսական բուրգ ստեղծելու, կազմակերպելու կամ ղեկավարելու հատկանիշներով՝ դեռեւս 2018թ հարուցված քրեական գործի նախաքննությունը շարունակվում է․ գործը ընդլայնվել է։ Սա հայտնի գործն է, երբ ըստ իրավապահների՝ Երևանում գտնվող մի կազմակերպություն հիպնոսի և նեյրոլինգվիստիկ ծրագրավորման եղանակով հաճախորդներից գումարներ է կորզել՝ յուրաքանչյուրից 2000 դոլարին համարժեք դրամ՝ նրանց վաճառելով տուրիստական փաթեթներ։
«Ա1+»-ն այս գործի ընթացքի վերաբերյալ տեղեկություն ստանալու համար դիմել էր ՔԿ։ Հիշեցնենք, որ ոստիկանության հաղորդագրությունից մեկ տարի անց՝ այս տարվա փետրվարի 11-ին, ՀՀ Ազգային անվտանգության ծառայությունն «Ֆինանսական բուրգ հանդիսացող կազմակերպության» վերաբերյալ հաղորդագրություն տարածել նշելով, որ քրեական գործ է հարուցվել, սակայն նշված չէր՝ կոնկրետ ինչ հոդվածով։
ՔԿ մամուլի խոսնակ Ռիմա Եգանյանը մեզ հայտնեց, որ ՀՀ Ազգային անվտանգության ծառայության քննչական դեպարտամենտում 2020թ. հունվարի 30-ին ՀՀ քրեական օրենսգրքի 189.1 հոդվածի 3-րդ մասի 1-ին կետի հատկանիշներով հարուցված քրեական գործն ընդունվել է ՀՀ քննչական կոմիտեի Երևան քաղաքի քննչական վարչության ծանր հանցագործությունների քննության բաժնի վարույթ և միացվել Երևան քաղաքի քննչական վարչության ծանր հանցագործությունների քննության բաժնում ՀՀ քրեական օրենսգրքի 189.1 հոդվածի 1-ին մասի հատկանիշով քննվող քրեական գործին:
Նրա փոխանցմամբ՝ քրեական գործով այս պահի դրությամբ տուժողի դատավարական կարգավիճակ ունի 10 անձ, հարցաքննվել է շուրջ 7 տասնյակ վկա, 1 անձ ներգրավվել է որպես մեղադրյալ, վերջինիս նկատմամբ որպես խափանման միջոց է կիրառվել չհեռանալու մասին ստորագրությունը: Կոմիտեն գործով որպես մեղադրյալ ներգրավված անձի տվյալները, նախաքննության գաղտնիության ապահովման անհրաժեշտությունից ելնելով, չի տրամադրել:
«ՀՀ իրավապահ մարմինների միջոցով արտերկրից ստացվել են քրեական գործի համար նշանակություն ունեցող տվյալներ, որոնց բովանդակությունը նախաքննության ներկա փուլում հրապարակման ենթակա չէ: Կատարվում են անհրաժեշտ քննչական և դատավարական գործողություններ ենթադրյալ հանցավոր սխեմայի մեջ ներգրավված անձանց ամբողջական շրջանակը պարզելու, վերջիններիս արարքներին իրավական գնահատական տալու ուղղությամբ։ Նախաքննությունը շարունակվում է»,- նշված է ՔԿ մամուլի խոսնակի պատասխանի մեջ։
Գործն, ամենայն հավանականությամբ, վերաբերում է ցանցային մարքեթինգով («բինարային» տեսակի համակարգով է գործում) զբաղվող «Օնիքսում» կազմակերպությանը, որը զբաղվում է աշխարհի տարբեր հյուրանոցային փաթեթների առցանց վաճառքով։
2019 թվականին դեկտեմբերի 13-ին «Առավոտ» կայքում հրապարակված հոդվածի համաձայն՝ «ՕՆԻՔՍՈՒՄ ԱՐ ԷՅ» ՍՊԸ-ն 2019 թվականի մայիսի 27-ին Հայաստանի Հանրապետությունում գրանցված իրավաբանական անձ է, որը հիմնադրվել է աշխարհի 160-ից ավել երկրներում գործող հազարավոր բարձրակարգ հյուրանոցների հետ համագործակցող և աշխարհի տարբեր երկրներում հյուրանոցների փաթեթների ամրագրում և վաճառք իրականացնող «11007823 Կանադա Ինկ.» կազմակերպության կողմից։