Այս պահին խցում մենակ եմ, բայց անձնակազմի հետ շփումը շարունակվում է. Ռ. Քոչարյան (տեսանյութ)
Աջակցիր «Ա1+»-ինԵրևանի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի նախագահությամբ շարունակվում է Մարտի մեկի գործով սահմանադրական կարգը տապալելու մեջ մեղադրվող Ռոբերտ Քոչարյանի և մյուսների գործով հերթական դատական նիստը։
Դատավորի այն հարցադրմանը, թե ի՞նչ պայմաններ են այն քրեակատարողական հիմնարկում, որտեղ գտնվում է Ռոբերտ Քոչարյանը, վերջինս անձամբ պատասխանեց և ներկայացրեց իրավիճակը.
«Քրեակատարողական հիմնարկում աշխատողների 80 տոկոսը աշխատում են մեկ օր և երեք օր ազատ են, ոչ մեկ իրենց չի կարող վերահսկել՝ ինչով են զբաղվում աշխատանքային օրվանից դուրս: 90 տոկոսը երիտասարդ է, սա նշանակում է, որ 50 տոկոսը իրենցից նույնիսկ վարակվելու դեպքում ասիմտոմատիկ են լինելու և կարող են գալ աշխատանքի»:
Քոչարյանը փոխանցեց, որ այս պահին իր իսկ ցանկությամբ խցում մենակ է, բայց անձնակազմի հետ շփումը շարունակվում է, և այն սահմանափակել հնարավոր չէ՝ շենքային պայմաններից ելնելով:
«Ուտելիքը աութսորս է արվում մասնավոր ընկերության կողմից, բերում են փաթեթավորված, պենոպլաստից փաթեթներ մեջ, և որևէ մեկը չի կարող երաշխավորել, որևէ թեստավորում չի արվում՝ ով է աշխատել, ով է կերակուրները պատրաստել, առաքել, ուղղակի անորոշ է»:
Նրա խոսքով՝ շենքային պայմաններում չկա օդափոխություն կամ այլ պայմաններ, թեև անձնակազմը փորձում է պահպանել կարանտինային պայմանները:
Փաստաբան Հայկ Ալումյանն էլ հավելեց, որ Ռոբերտ Քոչարյանը այս պահին գտնվում է Իզմիրյան բժշկական կենտրոնում, և հիվանդասենյակում իր հետ պարտադիր գտնվում է քրեակատարողական հիմնարկի ներկայացուցիչ, քանի որ որպես խափանման միջոց ընտրված է կալանավորումը.
«Դուք պատկերացրեք ամեն հերթափոխին 5-6 հոգի, իրար փոխարինելով, գալիս են, սենյակում նստում են, և այդ անձնակազմը 3 օրը մեկ է գալիս»:
Քոչարյանն էլ հավելեց, որ ապրում է, ինչպես հանրակացարանում.
«Իմ հետ սենյակում գտնվում է մարդ, ով պարբերաբար փոխվում է, իմ շփման մակերեսը մոտ 70 մարդ է շաբաթվա ընթացքում: Եթե սա նորմալ է, ուրեմն՝ թող այսպես մնա»,- ասաց նա: