Գործադիրն առաջարկում է հստակեցնել պարետի և պարետատան դերն ու կարգավիճակը (տեսանյութ)
Աջակցիր «Ա1+»-ինՊետական բյուջեի մասին օրենքում փոփոխություն և լրացումներ կատարելու նախագծի քննարկումները Ազգային ժողովը կշարունակի վաղը:
Այժմ Ազգային ժողովը քննարկում է «Արտակարգ դրության իրավական ռեժիմի մասին» ՀՀ օրենքում փոփոխություններ և լրացումներ կատարելու մասին» և «Նորմատիվ իրավական ակտերի մասին» ՀՀ օրենքում լրացում կատարելու մասին» նախագծերը առաջին ընթերցմամբ ընդունելու հարցը:
Խորհրդարանում հարցը զեկուցեց Արդարադատության նախարարի առաջին տեղակալ Ռաֆիկ Գրիգորյանը: Գործադիրն առաջարկում է հստակեցնել պարետի և պարետատան դերը, կարգավիճակը, պարետի կողմից ընդունվող ակտերի բնույթը:
«Նախագծով սահմանվել է, որ իր լիազորությունների կատարման ընթացքում պարետը կարող է ընդունել ակտեր որպես համապատասխանաբար վարչապետի կամ փոխվարչապետի կողմից ընդունված ակտ, այդ թվում՝ նաև ենթաօրենսդրական նորմատիվ ակտեր»:
Պատգամավորների առաջարկությամբ որոշվել է, որ պարետատունը պետք է ստեղծվի կառավարության որոշման հիման վրա:
Գործող սահմանափակումների ներքո հստակեցվել են որոշ միջոցառումներ: Օրինակ՝ ուսումնական գործընթացի կազմակերպման և իրականացման սահմանափակումը, տրանսպորտային միջոցներով տեղափոխվող ուղևորների քանակի նորմավորումը և այլն:
Համաճարակի կանխման նպատակով սահմանվել է նաև անձի անձնական ազատության սահմանափակման հնարավորություն:
Իր ազատության սահմանփակման մասին անձը իրավունք ունի տեղեկացված լինելու: Անձի ազատությունը կսահմանափակվի գրավոր կարգադրությամբ:
Եթե տվյալ պահին հնարավոր չէ գրավոր ակտ ընդունել, երբ հնարավոր չէ, կսահմանվի բանավոր, որին կհաջորդի գրավոր ամրագրումը:
ԼՀԿ ղեկավար Էդմոն Մարուքյանը փոխնախարարից հետաքրքրվեց, թե արդյոք այս փաթեթով օրինականացվո՞ւմ են պարետի՝ մինչ այս կայացրած որոշումները: Մարուքյանը նաև նշեց, պարետը փաստորեն չուներ սահմանափակումներ մտցնելու հնարավորություն, բայց այդ սահմանափակումների հիման վրա 10 հազարից ավելի մարդու նկատմամբ վարչական արձանագրություն է կազմվել, արդյոք այդ տուգանքները չպիտի՞ չեղարկվեն, որովհետև իրավական հենքը նոր է ստեղծվում:
Փոխնախարարը ասաց, որ ոչ իրավաչափ որոշումներ չեն ընդունվել, Սահմանադրությունը և միջազգային փորձը նախատեսում են ակտեր ընդունելու հնարավորություն, այս նախագիծը միայն հստակեցնում է պարետի գործառույթները:
Ինչ վերաբերում է ազատ տեղաշարժի խախտման հիմքով վարչական արձանագրություններին, փոխնախարարն ասաց, որ ազատ տեղաշարժի սահմանափակումը ամրագրված է կառավարության որոշմամբ:
