Իսպանիայում կպատժեն խաղալուց հրաժարվող թիմերին ու ֆուտբոլիստներին
Աջակցիր «Ա1+»-ինԻսպանիայի ֆուտբոլի պրոֆեսիոնալ լիգայի նախագահ Խավիեր Տեբասը հայտարարել է, որ կպատժվեն բոլոր այն ակումբներն ու ֆուտբոլիստները, ովքեր առաջնության վերսկսումից հետո կհրաժարվեն խաղադաշտ մտնել և խաղալ: Այդ մասին հայտնում է իսպանական AS սպորտային թերթը:
«Ինչ կլինի, եթե ակումբը կամ ֆուտբոլիստը հրաժարվի խաղադաշտ մտնել և խաղալ: Եթե մեզ ասեն, որ կարելի է խաղալ, ապա խաղից հրաժարվող թիմին կգրանցվի տեխնիկական պարտություն, ինչպես ընդունված է կանոնակարգով: Նույնը վերաբերում է նաև խաղացողներին: Հրաժարվելու դեպքում ֆուտբոլիստը կորակազրկվի:
Լիգան 1 մլրդ եվրո կկորցնի, եթե չավարտի առաջնությունը: Առանց հանդիսականներով խաղալու դեպքում մեր կորուստը կկազմի ընդամենը 350 մլն եվրո: Մենք չեն քննարկել առաջնությունը ժամանակից շուտ ավարտելու տարբերակը: Համոզված եմ, որ կկարողանանք ավարտել մրցաշրջանը և Լա Լիգայում, և եվրոգավաթներում», - ասել է Լա Լիգայի ղեկավարը:
Նշենք, որ Իսպանիայի առաջնությունը դադարեցվել է 27-րդ տուրից հետո: Լիգայի ղեկավարները ցանկանում են մրցաշարը վերսկսել հունիսի 6-ից, սակայն ֆուտբոլիստների մեծ մասը դեմ է այդ որոշմանը՝ համարելով, որ այդ ժամանակ դեռևս անվտանգ չի լինի երկրում կապված կորոնավիրուսի պանդեմիայի հետ:
