«1408 տարի է անհրաժեշտ, որպեսզի 416 000 դրամ աշխատավարձով պաշտոնյան 14,5 մլն դոլարի գույք ունենա» (տեսանյութ)
Աջակցիր «Ա1+»-ին«Իմ քայլը» խմբակցության պատգամավորները սուր ելույթներ են ունենում Ապօրինի ծագում ունեցող գույքի բռնագանձման մասին և կից ներկայացված նախագծերի փաթեթի վերաբերյալ։
ԱԺ-ում փաթեթի քննարկմանը իշխող ուժի պատգամավորների ելույթները «նախկինում թալանածի» և դրանք պետական բյուջե վերադարձնելու մասին են։
Արեն Մկրտչյանը ներկայացրեց 2017թ․-ին արված մի լրագրողական հետաքննություն, որը վերաբերում էր բարձրաստիճան նախկին պաշտոնյաններից մեկին։ Արեն Մկրտչյանը անուն չհնչեցրեց։ Ըստ նրա՝ տվյալ պաշտոնյայի հայտարարագրված աշխատավարձը 416 000 դրամ է կազմել։ Հետաքննության արդյունքներով պարզվել է, որ այդ պաշտոնյան Երևանի թաղամասերից մեկում 3 մլն դոլար արժողությամբ դղյակ ունի, 72-ամյա թոշակառու մոր անունով 3 դղյակ՝ 5, 5 մլն դոլար արժեքով, հորաքրոջ որդու անունով 2 մլն դոլար արժողությամբ եռահարկ առևտրի կենտրոն ունի, ընկերոջ կնոջ քրոջ անունով՝ 4 մլն դոլար արժողությամբ բազմաբնակարան նորակառույց բնակելի շենք։
Արեն Մկրտչյանն այսքանով կանգ առավ, ասաց՝ ժամանակը չի բավարարի, որպեսզի մնացյալն էլ ներկայացնի։
«416 000 դրամ աշխատավարձով 14, 5 մլն դոլարի գույք ունենալու համար 1408 տարի է անհրաժեշտ։ Այսինքն՝ այդ պաշտոնյան պետք է ծնված լիներ 612 թ․-ին և ծնված օրվանից նշանակված լիներ այդ պաշտոնին»,- նկատեց Արեն Մկրտչյանը։ Ըստ նրա՝ այդ պաշտոնյաներն այս օրենքի ընդունումից հետո պետք է պատասխան տան, թե որտեղից իրենց այդքան գումար։
