Եթե դեղ կամ պատվաստանյութ չլինի, հնարավոր է, որ այս մարտահրավերի առաջ կանգնենք. Արսեն Թորոսյան (տեսանյութ)
Աջակցիր «Ա1+»-ինԵթե նույնիսկ մեր կատարած միջոցառումների միջոցով ունենանք վարակի անկում երաշխիք չկա, որ բռնկումը նորից չի կրկնվի. այսօր «Ազատություն» ռադիոկայանի ֆեյսբուքյան ասուլիսի ժամանակ նշեց Առողջապահության նախարար Արսեն Թորոսյանը:
Նախարարի խոսքով, հավանական է, որ աշնանը՝ ցրտերի ընկնելուն պես, կրկին կվերսկսվեն բռնկումները, քանի որ այս վիրուսի շրջանառությունը լավագույն սցենարների դեպքում ի սպառ չի վերանա, ինչպես լինում է մյուս վիրուսների դեպքում:
«Աշուն, ձմեռ և գարնան սկիզբ, եթե դեղ կամ պատվաստանյութ չլինեն, հնարավոր է, որ այս մարտահրավերի առաջ կանգնենք: Եվ այդ պատճառով մենք երկար ժամանակ պետք է պահպանենք սանիտարահիգիենիկ բոլոր պայմանները:
Արսեն Թորոսյանը նշեց, որ հաճախ են իրեն հարցնում, թե ինչո՞ւ վարակի տարածման սկզբում Հայաստան եկող մարդկանց բոլորին չեն մեկուսացրել։
Նա նշեց, որ Հայաստան են եկել տասյակ հազարավոր մարդիկ և հնարավոր չէր մեկուսացնել, սակայն նրանք գտնվում են բժիշկների վերահսկողության տակ:
«Եթե մեր երկիրը համեմատենք աշխարհի շատ երկրների հետ, շատ ավելին ենք, արել քան արել են ուրիշները: Ճիշտ է, այս պահին ունենք հարաբերականորեն մեծ թվեր, բայց, միևնույն է, մենք համարվում ենք լավ գործած և համաճարակներին պատրաստ երկրներից մեկը»:
Առողջապահության նախարարից հետաքրքրվեցին․ ո՞վ է Հայաստանի գլխավոր համաճարակաբանը․
«Հայաստանի վերջին սանիտարական բժիշկը կամ համաճարակաբանը ազատվել է 2005 թվականին և դրանից հետո չի եղել այդպիսի հաստիք և հակահամաճարակային հիվանդությունները կառավարվել են Հիվանդությունների վերահսկման կանխարգելման կենտրոնի կողմից , որը ենթարկվում է Առողջապահության նախարարությանը և բոլոր միջոցառումները ղեկավարվում են մեր համակարգմամբ այդ կենտրոնի կողմից և նման հարցադրումը անհասկանալի է: Հակահամաճարակային միջոցառումներով զբաղվում են միայն մասնագետները և ոչ մասնագետ չի զբաղվում»:
Արսեն Թորոսյանը ընդգծեց, որ որոշ գործընկերներ փորձում են իրենց կատարած գործողությունները դարձնել քաղաքական թեմա: Նա կոչ արեց դադարեցնել և վերադառնալ մասնագիտական դաշտ:
Նա տեղեկացրեց, որ այս պահին ծայրահեղ ծանր վիճակում 7 անձ կա, որոնք հիվանդացել են նոր կորոնավիրուսային վարակով։
