Վերջին երկու օրերին գների նվազման դինամիկա կա. ՏՄՊՊՀ նախագահ (տեսանյութ)
Աջակցիր «Ա1+»-ին«Պարենային ապրանքների քանակը բավարարում է ցանցերում՝ և՛ մատակարարների, և՛ արտադրողների մոտ»,-Կառավարությունում տեղի ունեցած մամուլի ասուլիսի ընթացքում վստահեցրեց ՏՄՊՊՀ նախագահ Գեղամ Գևորգյանը:
Ինչ վերաբերում է ապրանքների գներին, Գևորգյանն ասաց, որ վերջին երկու օրերին գների նվազման դինամիկա կա, բայց սա չի նշանակում է, որ պիկը հաղթահարված է.
Ըստ ՏՄՊՊՀ նախագահի տվյալների, օրինակ՝ բուսական յուղը փետրվարին եղել է 705 դրամ, մարտին բուսական յուղի գնի պիկը եղել է 735 դրամ, ապրիլի 8-ի դրությամբ գինը 25 դրամով նվազել է:
Ցիտրուսային մրգերի մասով գների բարձրացման դինամիկա կա,-ասում է Գևորգյանը՝ հավելելով, որ թանկացել է նարինջը, փոխարենը՝ մոտ 60 դրամով նվազել է մանդարինի գինը:
Ապրիլի 8-ի դրությամբ, 5 դրամով նվազել է ալյուրի գինը՝ 290-ից դարձել է 285 դրամ, հացի գինը չի փոխվել,-վստահեցնում է հանձնաժողովի նախագահը:
Ինչ վերաբերում է կոնկրետ Վանաձորում հացի գնի բարձրացման խնդրին, Գևորգյանն ասաց, որ Վանաձորում հացը միշտ համեմատած մյուս քաղաքների՝ շատ էժան է եղել, քանի որ արտադրողները շատ են.
«Հացի թանկացման խնդիրը կապված է եղել մի շարք փաստերի հետ, որոնք մենք այս պահին ուսումնասիրոմ ենք, մի փոքր հատված կապված է եղել ալյուրի գնի հետ, մի փոքր հատված կապված է եղել փաթեթավորման հետ, քանի որ այս օրերին առավել պաշտպանված փաթեթավորում են օգտագործել, բայց հիմնական պատճառը կապված է եղել սպառման ծավալների նվազման հետ՝ հաշվի առնելով նաև դպրոցների և մանկապարտեզների փակ լինելը, հաց արտադրողները չեն կարողացել իրացնել հացաբուլկեղենի տեսակները»:
Ավելացել է մատնաքաշի գինը, բայց նվազել լավաշի գինը,-ասում է Գևորգյանը: Նրա խոսքով՝ մտահոգիչ է այն, որ գների ավելացումը տեղի է ուենեցել համատարած:
Գևորգյանը վստահեցրեց, որ հանձնաժողովը հետևում է գների դինամիկային, շուկայում տեղի ունեցող փոփոխություններին և չի լինի տնտեսվարող, ով կխախտի օրենսդրությունը և պատասխանատվության չի ենթարկվի:
«Հանձնաժողովը արդեն որոշում է կայացրել, որ արտակարգ դրության պայմաններում տնտեսական մրցակացության պաշտպանության մասին օրենքի խախտումը կդիտարկվի ծանրացնող հանգամանք, սրա մասին զգուշացումը փոխանցվել է բոլոր տնտեսվարող սուբյեկտներին»:
Վերջին երկու օրերի ընթացքում գների նվազման դինամիկան կապում ենք արտարժույթի նվազման հետ,-ասում է ՏՄՊՊՀ նախագահը:
Նպարեղենի թանկացման վերաբերյալ Գևորգյանն ասում է, որ պարզել են՝ ավելացել են ձեռքբերման գները, ի տարբերություն ցիտրուսային մրգերի, իմբիրի, որտեղ ներմուծման գները այդքան էլ չեն ավելացել, բայց առևտրային ցանց հասնում են միջնոդների միջոցով, այդ պատճառով կա գների բարձրացում: