Վաղվանից պետք է ստեղծվի օրը 1000 թեստի հնարավորություն․ Նիկոլ Փաշինյան (տեսանյութ)
Աջակցիր «Ա1+»-ին«Հակաճգնաժամային միջոցառումների շրջանակում արդեն իսկ բաշխվել է 3 մլրդ 70 մլն դրամ»,-այս մասին Կառավարության այսօրվա նիստում հայտարարեց վարչապետ Նիկոլ Փաշինյանը:
Նաև հավելեց, որ այս թիվը նախատեսվածի 10 տոկոսից էլ պակաս է:
Վարչապետը տեղեկացրեց նաև, որ Կառավարությունն արդեն իսկ հրապարակել է այն պատուհանը, որով քաղաքացիները կարող են ճշտել՝ շահառու են, թե ոչ․ բազան կամբողջանա հաջորդ շաբաթվա վերջին:
Նիկոլ Փաշինյանը արձանագրեց, որ բանկերը 290 հազար քաղաքացիների տվել են վարկային արձակուրդ 9.3 մլրդ դրամի չափով, վարկային արձակուրդ է տրվել նաև 5300 իրավաբանական անձանց:
«Կան բոլոր հիմքերը ասելու, որ այս պրոցեսը կշարունակվի, այս որոշումները կայացվել են առանց որևէ վարչական ներգործության կառավարության կողմից: Այն, որ բանկային համակարգը մեր քաղաքական հորդորներին արձագանքել է, վկայությունն է այն բանի, որ ամենազգայուններից մեկը համարվող այդ համակարգը վստահություն է տածում Կառավարության կողմից իրականցվող հակաճգնաժամային քաղաքականության նկատմամբ, և սրա մասին վկայում են նաև շուկայում տեղի ունեցող պրոցեսները, արտարժույթի շուկան և բանկային համակարգը գտնվում են շատ հանդարտ վիճակում»:
Վարչապետն ասաց՝ բազմաթիվ առաջարկություններ են ստացել և աշխատում են ամեօրյա ռեժիմով, ճգնաժամը հաղթահարելու հստակ ռազմավարություն ունեն, ընդ որում՝ ճգնաժամը կառավարության տնտեսական զարգացման ռազմավարական պատկերացումների մեջ շատ բան չի փոխել:
Վարչապետը տեղեկացրեց, որ երեկ իրականացվել է կորոնավիրուսի 236 թեստ, որից դրական է 28-ը, ինչը նշանակում է՝ շարունակում ենք պահպանել զգուշավոր լավատեսությունը, բուժվածների թիվը 24 է:
Հայտնեց նաև, որ վաղը կքննարկվեն հետագա անելիքները առաջիկա կարգավորումների առումով:
Ըստ Փաշինյանի՝ վաղվանից պետք է ստեղծվի օրը 1000 թեստի հնարավորություն, առաջին փուլում հնարավոր է, որ այդ թեստերի թիվը 1000-ի չհասնի, քանի որ պետք է ցուցում լինի.
«Վաղվանից բոլոր բուժաշխատողներին և թոքաբորբով հիվանդ բոլոր քաղաքացիներին, այլ վիրուսային հիվանդություն ունեցող քաղաքացիներին կթեստավորենք և արդյունքներով ավելի ամբողջական պատկեր կունենանք ընթացիկ իրավիճակի մասին։
Չնայած վերջին օրերի քննարկումները մեզ բերում են այնպիսի եզրակացության, որ մենք ընդհանուր առմամբ տիրապետում ենք իրավիճակին»,- ասաց նա:
