«Ինչ-որ մարդիկ փող են ծախսում, որ իշխանության հետ անհամաձայնություն ունեցող մարդկանց վարկաբեկեն». Էդմոն Մարուքյան (տեսանյութ)
Աջակցիր «Ա1+»-ինԱԺ ԼՀԿ խմբակցության ղեկավար Էդմոն Մարուքյանը ֆեյսբուքյան ուղիղ եթերում անդրադաձավ ֆեյք էջերին, յութուբյան ալիքներին և դրանցով տարածվող կեղծ տեղեկատվությանը:
Մարուքյանը տեղեկացրեց, որ յութուբյան ալիքները իրենց մոնիթորինգի տակ են․ պարզել են, որ դրանք հիմնականում աշխատում են այն գործիչների դեմ, ովքեր քննադատական կարծիք են հայտնում գործող իշխանության հասցեին:
Ըստ Մարուքյանի՝ իրենց վարկաբեկելու համար ծախսվում են գումարներ:
«Ինչ-որ մարդիկ փող են ծախսում, որ իշխանության հետ անհամաձայնություն ունեցող մարդկանց վարկաբեկեն»:
Մարուքյանը նշեց, որ ԱԺ-ում վերջին բանավեճից հետո մի կին ԼՀԿ-ի մասին անում է վարկաբեկող գրառումներ, ինչը մեծ դիտումներ , հավանումներ ու տարածումներ է ունենում:
Պատգամավորն առանձնացրեց մի քանի հրապարակում, որոնք վերաբերում են անձամբ իրեն և տարածվել են տարբեր էջերի կողմից:
Հորդորեց ուշադիր լինել նմանատիպ նյութերից օգտվելիս, քանի որ շատ մարդկանց փորձում են վարկաբեկել.
«Մի բան ակնհայտ է՝ գոյություն ունեն ավանդական ինֆորմացիոն կայքեր, թերթեր, որոնք որ տեղեկատվություն են տալիս և այդ կայքերում, թերթերում դուք չեք տեսնի նմանատիպ նյութեր»:
Ըստ Մարուքյանի՝ սրա պատասխանատուն իշխանությունն է, որովհետև նմանատիպ էջերում պատրաստվում են նյութեր միայն իշխանության հետ անհամաձայնություն ունեցող մարդկանց մասին.
«Այս արատավոր պրակտիկան մեր երկրում պետք է դադարեցվի, սրա համար պետք է կոնկրետ մարդիկ պատասխան տան: Իմ մտահոգությունը մեր քաղաքացիներն են, քանի որ էս էժանագին նյութերը, դեղին մամուլը դառնում են սպառման առարկա հազարավոր մարդկանց համար»: