«Նեմանի» ֆանատները կոչ են արել բոյկոտել Բելառուսի ֆուտբոլի առաջնությունը
Աջակցիր «Ա1+»-ինԲելառուսի ֆուտբոլի բարձրագույն խմբում հանդես եկող «Նեման» թիմի ֆանատները կոչով դիմել են մնացած ակումբների երկրպագուներին ու Բելառուսի ֆուտբոլի ֆեդերացիային՝ կորոնավիրուսի պանդեմիան երկրում կանգնեցնելու համար:
«Մենք, «Նեմանի» ֆանատները, ուզում ենք դիմել երկրի բոլոր ակտիվ երկրպագուներին: Հասկանում ենք, որ «ինչ-որ մեկը ստում է», այդ իսկ պատճառով երկրում տիրող բարդ էպիդեմիայի պայմաններում մենք այլևս չենք այցելում խաղերին: Դա դժվար որոշում է, քանի որ թիմին թողել ենք առանց աջակցության, սակայն այժմ ամենագլխավորը մարդկանց կյանքերը փրկելն է: Մենք երկրի բոլոր ֆանատներին կոչ ենք անում մնալ տանը, կանխել վիրուսի տարածումը, պաշտպանեք ինքներդ ձեզ և մյուսներին: Միաժամանակ ԲՖՖ-ին կոչ ենք անում վերջապես քաջություն դրսևորել և դադարեցնել առաջնությունը, ինչպես դա արել են ողջ աշխարհում», - ասված է «Նեմանի» ֆանատների հայտարարության մեջ:
Նշենք, որ Բելառուսի ֆուտբոլի առաջնությունը նոր է մեկնարկել և առայժմ կայացել է երկու տուր: Երկրում կորոնավիրուսի տարածման պատճառով ֆուտբոլի ֆեդերացիան արգելել է անչափահասների մուտքը մարզադաշտեր:
Նշենք, որ Բելառուսի նախագահ Ալեքսանդր Լուկաշենկոն կարանտին չի մտցրել երկրում, այդ իսկ պատճառով ԲՖՖ-ն հայտարարել է, որ մտադիր չէ ընդհատել առաջնությունը:
